Më shumë se 60 emigrantë besohet se janë mbytur në një anije që u fundos në brigjet e Libisë. Lajmin e dha Organizata Ndërkombëtare për Migracionin (IOM). Duke cituar të mbijetuarit, agjencia e OKB-së tha se anija u nis nga qyteti i Zuwara me rreth 86 persona në bord. Ata thanë se dallgët e larta përmbytën varkën dhe se 61 emigrantë, përfshirë edhe fëmijë, ishin të zhdukur dhe supozohej të kishin vdekur.
Libia është ndër pikat kryesore të nisjes për emigrantët që përpiqen të kalojnë Mesdheun dhe të hyjnë në Evropë. IOM vlerëson se më shumë se 2200 njerëz janë mbytur teksa tentonin kalimin vetëm këtë vit, duke e bërë atë një nga rrugët më të rrezikshme të migrimit në botë. Agjencia tha se shumica e viktimave të incidentit të fundit ishin nga Nigeria, Gambia dhe vende të tjera afrikane.
25 të mbijetuar ishin transferuar në një qendër paraburgimi libiane dhe po u jepej mbështetje mjekësore. Duke shkruar në X, një zëdhënës i IOM-it e quajti numrin e të vdekurve për këtë vit një "numër dramatik që për fat të keq tregon se nuk po bëhet mjaftueshëm për të shpëtuar jetët në det".
Në qershor, të paktën 78 njerëz vdiqën dhe 100 të tjerë u shpëtuan pasi një varkë peshkimi u fundos në jug të Greqisë. Ata që bëjnë udhëtimin shpresojnë të zbarkojnë në Itali përpara se të shkojnë në vende të tjera të Evropës. Më shumë se 153 mijë emigrantë kanë mbërritur në Itali këtë vit nga Tunizia dhe Libia, sipas agjencisë së OKB-së për refugjatët. ©LAPSI.al
