Kryetari i bashkisë së Tiranë, Erion Veliaj ka urdhëruar që kopshti zoologjik të kthehet në drejtori të përgjithshme. Vendimi i firmosur nga Veliaj parashikon që drejtori i përgjithshëm të ketë një pagë prej 1.4 milionë lekësh. Pervec drejtorit të përgjithshëm, në organik parashikohet një drejtor drejtorie, rroga e të cilit do të jetë 1 milionë e 150 mijë lekë.
Anëtari i Këshillit Bashkiak të Tiranës, Tedi Blushi ka publikuar vendimin e kryebashkiakut Erion Veliaj dhe pagën e secilit punonjës që do të përfshihet në këtë drejtori të re.
Në Tiranën e një mijë e një halleve, abuzimet me taksat e qytetarëve nuk kanë fund!
Për të qeshur dhe për të qarë: Erion Veliaj u cakton Drejtor të Përgjithshëm kafshëve të egra të Kopshtit Zoologjik.
Pagën e Drejtorit e propozon 1.4 milion lekë.
Pra "burgun" e kafshëve e kthen në Drejtori të Përgjithshme dhe cakton madje edhe Drejtor Drejtorie me pagë 1.15 milion lekë, si dhe Përgjegjës Sektori me pagë 920 mijë lekë.
Detyrat e tyre funksionale: të mbarështojnë kafshët e egra!
Që luani, majmuni, rrëqebulli, ujku, dhelpra, sorkadhja, qelbësi, fazani dhe kafshët e tjera kanë nevojë për Drejtor të Përgjithshëm, Drejtor Drejtorie dhe Përgjegjës Sektori këtë vetëm Erion Veliaj mund ta kuptojë!
Ndërkohë bonusi i qerasë që Bashkia e Tiranës jep për familjet që u janë shembur shtëpitë është 24 mijë lekë.
Ndërsa për personat me aftësi të kufizuar ndihma ekonomike varion nga 7 mijë në 30 mijë lekë!
Nuk është asgjë tjetër vetëm abuzim i pastër me taksat, shpërblim për patronazhistët nëpërmjet fryrjes fiktive të administratës! Kur në fakt është vetë për "kafaz" tek 313-ta për firmën e hedhur tek inceneratori i Tiranës!
