Arrestimi i Sali Berishës është çështje kohe. Ish-kryeministri nuk iu bind kërkesave të SPAK për ta izoluar brenda vendit duke i sekuestruar pasaportën dhe nuk u paraqit para oficerit të policisë gjyqësore, ndaj tani do të përballet me masa më të ashpra, siç është arrestimi i tij, izolimi në burg ose në arrest shtëpie. Vetëm se për ta arrestuar, SPAK nuk do e anashkalon dot Kuvendin e Shqipërisë, siç bëri deri tani.
Këtë paradite u bë publike një shkresë e firmosur nga Altin Dumani, kreu i SPAK që i kërkon kuvendit autorizim për arrestimin e Berishës dhe që i hap rrugë më pas caktimit të një mase sigurie për ish-kryeministrin. Në shkresën dërguar parlamentit, drejtuesi i Prokurorisë së posaçme Altin Dumani, nuk e ka përcaktuar masën e kërkuar, duke folur për zëvendësimin e masës së mëparshme me “arrest me burg/arrest shtëpie”.
Shkresa e zbardhur e SPAK për Berishën
"E nderuar znj. Kryetare e Kuvendit!Mbështetur në nenin 73 të Kushtetutës së Republikës së Shqipërisë, nenin 231, 260, 288, 289 të K.Pr. Penale, si dhe në Rregulloren e Kuvendit të Republikës së Shqipërisë, nenet 13 dhe 118, bashkëlidhur ju përcjellim kërkesën për dhënien e autorizimit nga Kuvendi i Republikës së Shqipërisë, për arrestimin/heqjen e lirisë së deputetit Sali Berisha, nëpërmjet zëvendësimit të masës së sigurimit personal shtrëngues nga ajo e "Detyrimit për t'u paraqitur në policinë gjyqësore", parashikuar nga neni 234 i K.Pr.Penale dhe "Ndalim i daljes jashtë shtetit" parashikuar nga neni 233 i K.Pr.Penale, në atë të arrestit me burg/ arrest shtëpie, parashikuar nga nenet 238/237 të K.Pr.Penale, në kuadrin e proçedimit penal nr. 287 të vitit 2020, të Prokurorisë së Posaçme Kundër Korrupsionit dhe Krimit të Organizuar në Tiranë" shkruhet në kërkesën e SPAK
Berisha është nën hetim nga SPAK për çështjen e privatizimit të kompleksit Partizani. Por ndaj tij nuk është ngritur asnjë akuzë. Ai është në hetim në dyshimet për “korrupsion” në rastin i procedurave të privatimit të ish klubit sportiv Partizani, ku dhëndri i tij Jamarbër Malltezi, ishte një ndër pronarët e truallit mbi të cilin më pas u ngrit një komplek pallatesh. Edhe Jamarbër Malltezi fillimisht u arrestua, por më pas u la me arrest shtëpie.
Më herët, Berisha nuk iu bind thirrjeve të gjykatës për sekuestrimin e pasaportës apo për t'u paraqitur para oficerit të policisë për të vlerësuar masën detyrim paraqitje. Sipas Berishës, prokurorët e SPAK kishin shkelur Kushtetutën duke shmangur rolin e parlamentit me kërkesën për t'i sekuestruar pasaportën.
Kjo ishte edhe arsyeja që SPAK kërkoi ashpërsimin e masës së sigurisë duke u detyruar t'i drejtohet kuvendit për heqjen e imunitetit. Tani që kërkesa shkoi në Kuvend, Berisha tha se do t'i bindet vendimit.
Lexo edhe: Kronologjia/ Si arriti SPAK tek “provat” e korrupsionit të Berishës
Lexo edhe: Procesi Partizani/ Furi sulmesh ndaj dy gjyqtareve “të posaçme”
“Cilido qoftë vendimi i parlamentit do ta pranoj” u shpreh Berisha pas mbledhjes së grupit parlamentar. Ai tha se protesta e opozitës në parlament do të vazhdojë njësoj si në 6 javët e fundit kur deputetët kanë refuzuar të bëhen pjesë e punimeve.
“Kuvendi do më njoftojë, por unë do të lexoj një herë vendimin zyrtar dhe pastaj do të shprehem. Baza e këtij qëndrimi është propozimi në 2012 për heqjen e çdo lloj imuniteti. Do të zbatoj vendimin e kuvendit. Pse e bëra këtë? Që askush të mos i marrë pushtetin parlamentit. Mbrojta Kushetutën dhe parlamentin sepse prokurorët politikë i lejuan vetes të shkruajnë në tavolinë nenet e kushtetutës” u shpreh Berisha për gazetarët./Lapsi.al
