Këtë të premte iu dha lamtumira e fundit, Liridona Murselit. 33-vjeçarja u ekzekutua në një inskenim të bashkëshortit të saj, Naimit i cili bashkëpunoi me dy persona të tjerë për eliminimin e bashkëshortes së tij. Nëna e dy fëmijëve u varros në fshatin Cërmanjë të Gjakovës, fshat ku banon familja e bashkëshortit të saj, Naim Murselit.
Por pas zbulimit të së vërtetës dhe arrestimit të Murselit, mediat e Kosovës shkruajnë se familja e Liridonës kërkon zhvarrosjen e trupit të vajzës së tyre. Ata kërkojnë ta varrosin të bijën e tyre në fshatin e tyre në Rracaj.
Gjatë mbrëmjes së sotme u zbuluan detajet tronditëse që sollën arrestimin e Naim Murselit i cili dyshohet se i kishte premtuar ekzekutorit 30 mijë euro për vrasjen e të ndjerës. Thuhet se 15 mijë euro ia kishte dhënë para ngjarjes dhe pjesën tjetër do ta merrte pasi të kryente krimin.
Deri më tani janë arrestuar 3 persona në lidhje me këtë ngjarje: Naim Murseli (bashkëshorti i Liridonës), Granit Plava (autori) si dhe Kushtrim Kokalla, nipi i Murselit (bashkëpunëtor në ngjarje).
Naim Murseli shfaqej shpesh në rrjetet sociale ku ekspozonte jetën e luksit që bënte. Shpesh postonte foto nën shoqërinë e VIP-ave. Në foton e tij të fundit në facebook ai shfaqet me këngëtaren Rita Ora. ©LAPSI.al
