Departamenti Amerikan i Shtetit (DASH) publikoi raportin vjetor mbi terrorizmin në botë për vitin 2022. Mes vendeve të marra në analizë është edhe Shqipëria. Për vendin tonë thuhet se vijoi mbështetjen e saj të fortë për përpjekjet ndërkombëtare kundër terrorizmit duke riatdhesuar 13 shtetas të saj nga kampi i personave të zhvendosur al-Hol në Siri dhe duke u angazhuar në procesin e riintegrimit dhe rehabilitimit të tyre gjatë gjithë vitit.
DASH thotë se Shqipëria ka miratuar një strategji kombëtare kundër terrorizmit dhe kundër ekstremizmit të dhunshëm deri në vitin 2025. Departamenti Amerikan i Shtetit vëren se kërcënimi i terrorizmit në Shqipëri konsiston në përpjekjet e organizatave të huaja terroriste për të radikalizuar të rinjtë shqiptarë drejt dhunës. Gjatë vitit 2022 nuk ka pasur incidente terroriste të raportuara në Shqipëri.
“Në dhjetor, Gjykata Speciale për Krimin e Organizuar dhe Korrupsion dënoi një shtetas iranian me 15 vjet burg për përgatitjen e akteve terroriste. Më 28 maj, Shqipëria riatdhesoi me sukses 13 shtetas nga kampet e personave të zhvendosur në Siri. Ky ishte riatdhesimi i dytë në një periudhë 12-mujore të kryer nga autoritetet shqiptare, për gjithsej 38 gra dhe fëmijë të riatdhesuar” – thotë raporti që vëren edhe mangësitë e Shqipërisë.
“Korrupsioni dhe pengesat për ndarjen e informacionit ndërmjet agjencive qeveritare, koordinimi i pamjaftueshëm brenda agjencive dhe një sistem gjyqësor i dobët vazhduan të pengojnë përpjekjet e zbatimit të ligjit të Shqipërisë në të gjitha nivelet, përfshirë ato që lidhen me luftën kundër terrorizmit” – thuhet ndër të tjera në raport. Një tjetër problem është pastrimi i parave duke nënvizuar se Shqipëria mbeti në “listën gri” të Moneyval.
Departamenti i Shtetit mbikëqyri zbatimin e një granti të gjashtë për Komunitetin Mysliman Shqiptar, i cili përfshinte angazhimin e klerit me të rinjtë, prindërit e tyre dhe udhëheqësit qytetarë, për t'i larguar të rinjtë nga radikalizimi drejt dhunës, si dhe informimin e tyre për parimet demokratike, të drejtat e njeriut, angazhimin qytetar dhe tolerancën. ©LAPSI.al
