Paradiiten e sotme, kryeministri Rama ishte në Vlorë për të kryer nderime me rastin e 28 Nëntorit. Mes të tjerave, protokolli kishte parashikuar vendosjen e kurorave me lule në varrin e Ismail Qemalit, por kreu i demokratëve, Sali Berisha tha se Rama në fakt e ka përdhosur varrin, pasi me mbështetjen që i ka dhënë Serbisë ai është quajtur ndryshe si kryeministri më i mirë i Serbisë, pas Nikolla Pashiqit.
"Përpara meje, tek varri i të pavdekshmit, Ismail Bej Vlora, kishte vendosur kurorë edhe Pashiqi i Tiranës. Ishte një përdhosje e veprës së ndritur. Ishte një përdhosje e të gjithë atyre që luftuan dhe ranë për një Shqipëri të pavarur.
Një armik i qenies shqiptare, një kryeministër që vlerësohet nga politologët e kohës, si kryeministri më i mirë i Serbisë pas Nikolla Pashiqit, nuk meriton asnjë ditë karrigen që mban. Fyen ndërgjegjen kombëtare të çdo shqiptari, fyen të gjallët dhe të vdekurit e këtij vendi që kanë dashur dhe që e duan Shqipërinë dhe kombin" u shpreh Berisha.
Deklaratat e tij, Berisha i bëri gjatë një aktiviteti me rastin e festës së pavarësisë në selinë blu.
