Pas një procesi farsë me gjoja garë e kandidatura të tjera, Taulant Balla ka prezantuar sot drejtuesin e ri të Agjencisë së Mbikëqyrjes Policore që pason Ardi Veliun.
I zgjedhur mes 5 kandidatëve është Florian Sulajmani edhe pse dihej e pranohej gjerësisht se ai ishte paracaktuar si fitues.
Gjatë fjalës së tij, Balla theksoi se vetëpastrimi i Policisë së Shtetit është mision parësor i mandatit të tij.
“Agjencia e Mbikëqyrjes Policore duhet të fitojë në terren me rezultate konkrete në luftën kundër korrupsionit, abuzimit, bashkëjetesës me krimin – besimin e publikut dhe partnerëve tanë, kjo edhe falë bashkëveprimit në rritje me agjencitë e tjera ligjzbatuese, në mënyrë të veçante me SHISH dhe SPAK”, tha Balla.
“Jeni ju ata që duhet të hetoni çdo rast mosveprimi nga Policia. Rasti i Vlorës kur një vajzë e re viktimë e dhunës seksuale, apo ai I kopshtit në Tiranë, janë shembujt e këqij të veprimit të vonuar dhe standardit që tashmë është vendosur”, tha Balla.
