Shifrat e fundit për abuzimin e fëmijëve në Francë janë tronditëse. Çdo tre minuta në Francë, një fëmijë sulmohet seksualisht dhe çdo vit plaga e incestit prek 160,000 fëmijë.
Gjithashtu, çdo pesë ditë një fëmijë vdes në mjedisin e tyre familjar, raportojnë mediat e huaja. Të dhënat janë siguruar që në vitin 2015 nga Komisioni i Pavarur për Incestin dhe Dhunën Seksuale ndaj Fëmijëve, i njohur si “Ciivise”, me mision mbledhjen e dëshmive dhe propozimin e zgjidhjeve.
Nga 27,000 dëshmi të mbledhura në dy vitet 2021-2022, vetëm 8% e fëmijëve kanë pasur një përgjigje pozitive nga mjedisi social, pra i kanë dëgjuar, besuar dhe kujdesur për ta.
"Ne po krijojmë një shoqëri ku fëmijët rriten me trauma dhe nëse nuk kanë mbështetjen e nevojshme, ka të ngjarë të zhvillojnë probleme afatgjata si varësia nga droga, alkoolizmi, çrregullimet e të ngrënit, delikuenca ose patologji të pashpjegueshme", thuhet në botimin e Ciivise.
Për këtë arsye, përgjegjësja për mbrojtjen e fëmijëve, sekretarja Charlotte Kobel kërkon një fushatë kombëtare për të trajtuar problemin. Dhuna seksuale në familje është objektivi i parë i fushatës. Në të njëjtën kohë, Ciivise propozon forcimin e kurseve të edukimit mbi seksualitetin dhe jetën emocionale në shkolla, kolegje dhe shkolla të mesme, me të paktën tre sesione vjetore.
