Sot në orën 09:00 është caktuar seanca gjyqësore në Apelin e GJKKO për Sali Berishën. Në këtë seancë pritet që Apeli të vendosë për masën e sigurisë ndaj ish-kryeministrit të vendit, lidhur me hetimet për dosjen “Partizani”, vendim i ankimuar nga dy avokatët e tij.
Ndërkohë në orën 10:00 Berisha do të duhet të paraqitet në SPAK, teksa kujtojmë se në seancën e parë, ai nuk pranoi të shkonte. Opsionet janë të hapura, në varësi të vendimit të Apelit, i cili mund të lërë në fuqi masën ‘detyrim paraqitje’ apo ta rrëzojë atë.
Sipas juristëve, nëse Apeli pranon ankimimin e avokatëve dhe rrëzon masën e sigurisë, atëherë thirrja e Berishës në orën 10:00 në SPAK bëhet e pavlefshme. Ndërkohë, nëse Apeli lë në fuqi vendimin ndaj tij, dhe ish-kryeministri nuk paraqitet, atëherë SPAK ka të drejtë të kërkojë ashpërsim mase, por që kjo të ndodhë, do të duhet të kërkojë autorizim në Kuvend.
