"Edi Rama dhe Partia Socialiste jashtë Partive Socialiste Europiane", kështu shkruan media italiane La Repubblica që përcjell zërat e të majtës italiane e cila është e irrituar me kryeministrin e Shqipërisë Edi Rama, për të cilin thotë se "ka tradhëtuar vlerat e të majtës" duke pranuar të ngrejë një kamp për emigrantët afrikanë në Shqipëri.
Peppe Provenzano, një zyrtar i Partisë Demokratike të Italisë tha se do ta paraqesë kërkesën zyrtare të të majtës italiane në Malaga, Spanjë në takimin që do të kenë sot dhe nesër të majtët europianë. Do të jenë aty kryeministri Sançez i Spanjës, kancelari Olaf Sholz i Gjermanisë dhe Elly Schlein, sekretare e PD, zë i rëndësishëm i të majtës italiane.
Sipas PD-së italiane, depozitimi i refugjatëve afrikanë në Shqipër shkel të drejtën ndërkombëtare dhe është një vendim në shkelje të së drejtës ndërkombëtare. Të majtët shpresojnë që përjashtimi i Ramës dhe i Partisë Socialiste nga Partitë Socialiste Europiane do të jetë i shpejtë, duke marrë si shembull largimin e kryeministrit sllovak Robert Fico, që u përjashtua brenda dy javësh nga PSE. "Për Ramën procedura duhet të jetë më e shpejtë" thotë Provenzano.
Përjashtimi i Partisë Socialiste nga Partitë Socialiste Europiane pritet të sjellë efekte edhe në procesin e Shqipërisë për t'u anëtarësuar në Bashkimin Europian, shkruan La Repubblica.
Marrëveshja Rama-Meloni parashikon ngritjen e një kampi refugjatësh në Gjadër ku do të strehohen vetëm burrat mbi 18 vjeç. Në këtë kamp pritet të trajtohen rreth 36 mijë persona në vit.
