Pas akuzave të Sali Berishës dhe kreut të grupit parlamentar të Partisë Demokratike, Gazment Bardhi për gardistë të armatosur në ambientet e brendshme të Parlamentit dhe selisë së Kuvendit, reagoi Garda e Republikës duke e hedhur poshtë këtë pretendim.
Garda thekson se asnjë prej punonjësve të saj nuk ka qenë i armatosur.
Lexo më tej: Kriza në Kuvend, investim i Ramës për të eleminuar opozitën
REAGIMI
Lidhur me pretendimin e disa deputetëve të opozitës, se punonjës të Gardës në seancën parlamentare kanë qenë me armë në sallë, Garda e Republikës sqaron se:
Ky pretendim është tërësisht i pa vërtetë.
Asnjë prej punonjësve të Gardës së Republikës, siç parashikon baza ligjore në fuqi, nuk ka qenë i pajisur me armë zjarri brenda sallës ku zhvillohen punimet.
Garda e Republikës mbetet e vendosur të ushtrojë gjithë përgjegjësitë dhe detyrat e ngarkuara, në funksion të garantimit të ligjit.
