Në qendrën e kontrollimit teknik të veturave në Mitrovicë të Veriut janë krijuar radhë.
Qytetarët serbë po i kryejnë këto procedura para se të riregjistrojnë veturën e tyre.
Në qendrën e regjistrimit të veturave, qytetarët serbë të Mitrovicës së Veriut janë duke i dorëzuar targat e tyre ilegale KM, për t’i marrë ato të Republikës së Kosovës.
Qytetarët thonë që do të respektojnë këtë vendim të qeverisë së Kosovës.
“Po do i ndërrojmë. Jemi të detyruar se duhet të ngasim veturën”, thanë qytetarët.
Numri i qytetarëve të interesuar për ri regjistrimin e veturave është i lartë.
Në vetëm dy ditë, numri i targave të konvertuara shkoi mbi 200.
“Dje janë regjistruar 125 vetura, e sot deri në orën 12 janë regjistruar 55”, tha Veton Elshani, zv. drejtor i policisë në Mitrovicë të Veriut.
Për të konvertuar targat qytetarët serbë kanë kohë deri më datë një dhjetor të këtij viti.
Pas këtij afati, të gjithë ata që nuk i ndërruan targat nga ato ilegale në të Kosovës nuk do mund t’i përdorin automjetet e tyre.
“Shtyrja e afatit është zgjidhje politike, pas 30 dhjetor është punë policore. Do të trajtohen sikur ata që nuk e kanë vendosur rripin e sigurisë”, tha Elshani.
Për të përcjellë këtë proces në Mitrovicë të Veriut ishte edhe ministri i Punëve të Brendshme, Xhelal Sveçla që ishte optimist se veturat me targa KM do largohen nga territori i Kosovës.
“Me këtë tempo ne besojmë dhe jemi komod me kohë, për ata që nuk e shfrytëzojnë këtë afat nuk do të kenë mundësi të ngasin veturat e tyre nëpër rrugët e Republikës së Kosovës”, tha Xhelal Sveçla Ministër i Punëve të Brendshme.
Afati për konvertimin e targave është shtyrë për një muaj pas kërkesës së lartë nga qytetarët serbë të veriut./TCH
