Ditën e djeshme një punonjës 35-vjeçar ka humbur jetën teksa po priste degët e pemëve në plazhin e Durrësit. I riu ka rënë nga koshi i vinçit të punës, teksa po priste degët e pemëve në lagjen 13. Në këtë zonë po kryen punime për ndërtimin e pedonales. Mësohet se lidhur me këtë ngjarje janë arrestuar dy persona.
Në pranga është vënë Enrik Mahmutaj, 33 vjeç, i cili ishte drejtuesi teknik i firmës. Po ashtu, u arrestua Blerim Margeshi 42-vjeç, i cili ishte drejtuesi i vinçit nga ku u rrëzuar punonjësi që vdiq.
NJOFTIMI I POLICISË:
Në lidhje me informacionin paraprak të ditës së djeshme, për një shtetas që humbi jetën duke punuar, ju bejmë me dije se:
Specialistët për Hetimin e Krimeve të Stacionit të Policisë Plazh, në vijim të veprimeve hetimore të kryera në drejtimin e Prokurorisë, për këtë ngjarje të ndodhur në lagjen nr.13, ku humbi jetën punonjësi i një firme që kryen punime për ndërtimet e pedonales në këtë zonë, i cili po priste degët e palmëve, pa lejen e organeve kompetente, arrestuan në flagrancë për veprën penale “Shkelja e rregullave të mbrojtjes në punë”, shtetasit:
E. M., 33 vjeç, banues në Tiranë, me detyrë drejtues teknik i firmës;
B. M., 42 vjeç, banues në Durrës, drejtues i vinçit nga i cili ra shtetasi A. L., 35 vjeç, banues në Tiranë, i cili për pasojë humbi jetën.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
