Tre persona janë proceduar penalisht për prerje të paligjshme të pyjeve. Po ashtu në procedim penal është vënë edhe një inspektor pyjesh pasi dyshohet se shpërdoroi detyrën duke mos e raportuar paligjshmërinë e konstatuar. Ndërkohë janë sekuestruar 120 m3 lëndë drusore, pa dokumentacionin përkatës dhe 1 kamionçinë që shërbente për transport.
Sipas policisë shtetasit D. H., 37 vjeç dhe D. M., 37 vjeç, banues në fshatin Dardhas, Pogradec, , u kapën me automjetin kamionçinë tip “Benz”, me drejtues shtetasin D. H., duke transportuar 10 m3 dru zjarri, pa dokumentacionin përkatës.
Policia njoftoi se u arrestuan shtetasit A. Ç., 35 vjeç, banues në fshatin Stropkë dhe Xh. A., 61 vjeç, banues në Pogradec, pasi gjatë kontrollit të ushtruar tek rezervuari në fshatin Stropckë, 35-vjeçarit iu gjetën 110 m3 dru zjarri dhe 38 trupa të llojit ah pa dokumentacionin përkatës, të cilat u bllokuan në cilësinë e provës materiale. Nga hetimet e kryera rezulton se shtetasi Xh. A., me detyrë inspektor pyjesh në këtë zonë, nuk ka konstatuar dhe informuar strukturat përkatëse, për lëndën drusore të gjetur që dyshohet të jetë prerë në mënyrë të paligjshme.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
