Jorida Tabaku është në Itali, e ftuar si kryetare e Komisionit të Integrimit Evropian. Në axhendë ka pasur edhe një vizitë në senatin italian, gjatë një seance ku fliste kryeministrja e Italisë, Xhorxhia Meloni. Në fund të fjalimit drejtuesi i senatit Injacio La Rusa supozohej ta falenderonte Tabakun në shenjë kortezie, por siç duket ai harroi mikrofonin hapur dhe iu drejtua sekretarit të tij me fjalët: "është ende shqiptarja aty?"
Kjo mënyrë të foluri disi e shpenguar, por që i drejtohet të dërguarës së parlamentit tonë me emërtimin "shqiptarja" është dëgjuar kudo në sallë dhe në transmetim live në media..
Gjithsesi, pasi mori konfirmimin, La Russa deklaroi më pas: “Shfrytëzoj rastin të përshëndes të nderuarën Tabaku, kryetare e Komisionit të Integrimit Evropian të Kuvendit të Shqipërisë, i cili i shoqëruar nga një delegacion po na viziton”. Incidenti u bë viral në mediat sociale në Itali ku shumë komentues akuzuan eksponentin e "Vëllezërit e Italisë" për racizëm.
