Me urdhër të SPAK është arrestuar ish-drejtoresha e Kadastrës së Durrësit, Rajmonda Dashi. Dashi u arrestua teksa ishte në zyrën e saj.
Ajo aktualisht punonte në Drejtorinë e Kadastrës në Kamëz dhe Vorë. Rajmonda Dashi u ndalua me urdhër të SPAK, ndërsa mësohet se bëhet fjalë për një çështje të nisur 3 vite më parë nga Prokuroria e Posaçme, lidhur me tjetërsimin e pronave kur ajo mbante pozicionin e drejtoreshës së Kadastrës së Durrësit.
Dashit i është sekuestruar telefoni, ndërsa burime bëjnë me dije se janë edhe disa të tjerë të shoqëruar. Disa muaj më parë, Dashi kërkoi dorëheqje të parevokueshme nga ish-eprori i saj, Artan Lame. Që prej asaj kohe, ka nisur një hetim nga SPAK në Kadastrën Shtetërore, ku edhe janë marrë në pyetje disa punonjës.
