Dhëndri i ish-kryeministrit Sali Berisha, Jamarbër Malltezi është arrestuar mbrëmjen e sotme në aeroportin e Rinasit. Urdhri i arrestit është firmosur nga SPAK dhe dyshohet se lidhet me dosjen e kompleksit Partizani. Për këtë çështje janë vendosur edhe dy masa siguri ndaj kryeopozitarit Sali Berisha. Më konkretisht ndaj tij janë marrë masat shtrënguese detyrim paraqitje, si dhe ndalim për të dalë jashtë vendit.
Në pranga ka rënë edhe biznesmeni Fatmir Bektashi, ndërtues i pallateve tek ish-kompleksi Partizani. Hetimet ndaj tyre kanë kohë që kanë nisur dhe tashmë SPAK ka urdhëruar arrestimet.
Ka qenë ministri i Brendshëm, Taulant Balla, që e ka sjellë para SPAK këtë çështje. Ai ka ngritur kallëzim në lidhje me procedurat e ndjekura për privatizimin e pronës shtetërore “Klubi Sportiv Partizani” Tiranë. Privatizimi i ish-kompleksit Partizani filloi në vitin 2008 dhe përfundoi në katër vite më vonë, në vitin 2012.
