Një ngjarje e rëndë është regjistruar në Tiranë, me viktimë një 3-vjeçar i cili humbi jetën pasi mori një shërbim dentar. Dyshohet se i mituri vdiq si pasojë e marrjes së një doze të lartë anestezie gjatë një operacioni dhëmballësh. Për këtë ngjarje ka reaguar mjeku anestezist-kardiolog Roland Xhaxho, pasi ndërhyrja u krye në klinikën dentare të vajzës së tij dhe ishte vetë Xhaxho që injektoi anestezinë. Anestezisti shprehet se procedura e ndërhyrjes ka qenë sipas protokolleve. Sa i përket fëmijës, mjeku shton se ai ka dalë nga klinika i zgjuar, në krahët e të atit.
“Fëmija kreu në klinikë procedurat detare nën anestezi të përgjithshme ashtu siç ishim sqaruar me prindërit, të cilët janë firmosur edhe konsensusin. Pse u zgjodh kjo mënyrë trajtimi? Sepse djali ka lindur me difekt në zemër për të cilin është operuar rreth 2 vite më parë. Rekomandimi kryesor në këto raste është evitimi i çdo vatre infeksioni te këta fëmijë sepse shkakton infeksione të dhëmbëve të cilat në mënurë absolute duheshin kuruar brenda një seance në mënyrë që të evitohej përhapja e infeksioneve. Djali ka dalë nga klinika i zgjuar në krahët e babait të tij”, shprehet Xhaxho mes të tjerash.
Si rrodhi ngjarja?
Më 28 shtator, familjarët kanë dërguar 3-vjeçarin Brian Spahiu tek një klinikë private për të bërë trajtim të dhëmbëve dhe pastrim nga gurëzat. Pasi iu bë një grafi, prindërve iu tha se duhej proceduar në 14 dhëmbë. Për këtë arsye ai duhej t'i nënshtrohej një operacioni. Fëmija ka kryer procedurën dentare nën anestezinë që i injektoi mjeku Roland Xhaxho. Operacioni zgjati nga ora 10:30 deri në 15:30. Familjarët e nxorrën nga klinika në orën 15:30.
Pas operacionit, Briani është ndjerë keq dhe është dërguar në urgjencë në orën 19:00. Aty, familjarëve iu është thënë se të miturit i është helmuar mëlçia e për pasojë ai ndërroi jetë.
