Aktivisti i Vetëvendosjes, Arbër Zaimi ka reaguar pas deklaratës së Ramës në Financial Times se Kosova është tokë e askujt dhe se me kalimin e viteve është zbehur kufiri mes politikës dhe krimit. Sipas Zaimit, Rama ka bërë një ftesë ndaj grabitqarëve dhe plaçkitësve me deklaratat e tij, por si përgjigje mjafton t'i kujtohet se zv.kryeministri i Kosovës nuk është në arrati.
"Thënia se diçka është e askujt, është ftesë për grabitqarë e plaçkitës. Për gazetën me prestigj ndërkombëtar Financial Times kryeministri i Shqipërisë Edi Rama ka thënë se “Kosova është bërë me kalimin e viteve tokë e askujt” dhe se “kufiri që ndan krimin nga politika është zbehur”.Nuk duhet të humbasim durimin me të në këto kohë kur kërkohet unitet, por duhet t’i shpjegojmë se Kosova është tokë e popullit të saj, me mbi 93% shqiptarë e pjesa tjetër minoritete me të drejta të gjera e të thella. Kosova ka institucione shtetërore profesionale, të vlerësuara ndërkombëtarisht si demokratike, më të drejta e më të pakorruptuara se vendet fqinjë.
E sa i përket kriminalitetit, Kosova ka kriminalitetin më të ulët në Ballkan, sipas monitoruesve ndërkombëtarë. Përshembull, që ta kuptojë më mirë Rama, zëvendëskryeministri i Kosovës sot nuk është në arrati prej drejtësisë të vendit të vet, por është në Bruksel si i ftuar, për të ligjëruar mbi rrugën evropiane të Kosovës" shkruan Zaimi.
