Një operacion i madh policor po zhvillohet në disa qytete të vendit. Mediat raportojnë se me urdhër të Prokurorisë së Elbasanit janë lëshuar 15 urdhër-arreste. Sipas të njëjtave burime janë zbardhur 6 vrasje të kryera me pagesë nga grupi i të shumëkërkuarit Laert Haxhiu. Ngjarjet kriminale të kryera ndër vite janë zbardhur nga Artan Tafani, i cili është bërë bashkëpunëtor i drejtësisë.
Ai ka rrëfyer se vrasjet janë kryer në Greqi, Tiranë, Elbasan dhe Berat. Sipas të njëjtave burime, në mesin e personave që Tafani ka përmendur si autorë vrasjesh, janë edhe emra të njohur të botës së krimit. Operacioni është në vijim dhe në shumë akse kombëtare e qytete ka pika të shumta kontrolli për kapjen e personave në kërkim. Laert Haxhiu u arrestua disa muaj më parë në Greqi.
Që prej identifikimit dhe arrestimit, policia ka pasur dyshime të përfshirjes së Artan Tafanit në aktivitet të theksuar kriminal, pjesë e një grupi me bazë në disa qytete. Ai ishte mbajtur në vëzhgim për disa kohë dhe më pas është ndërhyrë për arrestimin e tij. Kapja e tij është mbajtur sekret për shkak të hetimeve dhe rrëfimeve që po bënte për ngjarjet kriminale.
Artan Tafani u arrestua disa ditë më parë nga Policia e Lushnjës, pasi ishte shpallur në kërkim si autor i grabitjes së 40 mijë eurove në një pikë të këmbimit valutor në zonën e Astirit në Tiranë. Ngjarja ndodhi mëngjesin e 28 qershorit 2023. 39-vjeçari rezulton se përdor dhe emrin “Marius” dhe sipas policisë ka qenë dhe më parë i dënuar për vjedhje.
Pas grabitjes ai u largua me biçikletë dhe me ndihmën e një tjetër personi e ka fshehur në një garazh automjetesh. Policia ka zbuluar dhe më pas ka arrestuar se bashkëpunëtori i Tafanit është Enio Meçaj, 35 vjeç, banues në Fier. Gjithashtu po në të njëjtin garazh, uniformat blu kanë gjetur dhe një automjet i cili rezultoi i vjedhur në Shkurt të 2023 në zonën e Shijakut. ©LAPSI.al
