Pas "disiplinimit" të bandave dhe "goditjes fatale" që i ka dhënë krimit të organizuar në Shqipëri përgjatë këtyre muajve, Taulant Balla tani është i fokusuar në çështje të tjera sensitive si mungesa e vendeve të parkimit dhe kaosi që krijohet me automjetet.
Ministria e Brendshme dhe Policia e Shtetit kanë ndërtuar një plan masash për të lehtësuar trafikun e rënduar jo vetëm në Tiranë, por edhe qytete të tjera të mëdha. Ministri Taulant Balla tha se shpejt do të ndërhyhet me karoatrec për të zhvendosur makinat e parkuara gabim.
Pra, me pak fjalë një biznes i ri do të lulëzojë nëpër Shqipëri. Policia e Shtetit do të kontraktojë kompani apo subjekte private për të "rrëmbyer" automjetet e qytetarëve. Pavarësisht se mund të aplikohet gjoba për parkimin e gabuar të mjetit sic e parashikon ligji, ministri i Brendshëm "reformator" i Edi Ramës e sheh të efektshme që makinat të merren me karrotrec.
“Ne duam mirëkuptimin e drejtueseve dhe drejtuesve të mjeteve, se makina juaj e parkuar gabim është një problem shumë i madh për të tjerët, të cilëve u ke zënë rrugën, po ashtu dhe një karshillëk i madh ndaj Kodit Rrugor. Numri i madh i masave ditën e djeshme në Tiranë, është një apel publik për reflektim dhe bashkëpunim drejtuar përdoruesve të mjeteve. Policia e Shtetit nuk do ta tolerojë asnjë çast këtë shkelje masive dhe këtë karshillëk. Brenda pak ditësh çdo mjet i parkuar gabim do të largohet nga vendqëndrimi i gabuar me makineri të specializuar të kontraktuar nga Policia Rrugore dhe do të bllokohet”, deklaron ministri.
“Parkimeve të gabuara vend e pa vend, parkimeve dyshe, treshe mu në mes të rrugës, parkimeve mbi trotuar apo tek korsia e biçikletave etj., do duhet t’i jepet fund. Trafiku i rënduar në kryeqytet dhe në qytetet e tjera ka si burim kryesor edhe parkimet e gabuara, të cilat bllokojnë rrjedhshmërinë e trafikut”, tha ministri Balla.
