Të tjera detaje janë zbuluar nga ngjarja që tronditi fshatin Volos në Greqinë qendrore, me 'protagonist' një çift të ri. 22-vjeçarja, Dafina Kurti e ardhur në Volos të Greqisë nga Shqipëria, u detyrua nga familja të martohej në moshën 18-vjeçare. E reja ka treguar para prokurorëve se erdhi në Volos në vitin 2021 nga Shqipëria.
Ajo ishte martuar me bashkatdhetarin e saj 28-vjeçar, Aurel Gëzim Kurti. Sipas saj, 28-vjeçari ishte një person mizor, “i egër”, që nuk kishte pasur kurrë kontakt me asnjë njeri. Ajo dhe fëmija i saj 2 vjeç, që ishte abuzuar që në barkun e nënës, jetonin brenda një shtëpie të mbyllur nën terrorin e Kurtit.
Çdo gjë u mësua pas episodit të fundit të dhunës që ushtroi 28 vjeçari. Ishin fqinjët ata që njoftuan policinë pas të bërtiturave të gruas së re e cila kërkonte ndihmë dhe zëri i fëmijës që qante me të madhe. Fqinjët goditën portën e banesës dhe gjetën brenda 22 vjeçaren Dafina Kurti, me shenja në qafe të krijuara prej tentativës për ta mbytur atë.
Sipas policisë greke, menjëherë autori ka tentuar të largohet. Banorët e mbajtën me force deri në mbërritjen e policisë, e cila e arrestoi dhe e dërgoi në drejtorinë e policisë së Volosit. Ndërkohë viktima rrëfeu se mbahej e mbyllur në banese prej 2 vitesh. Ajo po ashtu tregoi se dhunohej vazhdimisht deri sa humbiste ndjenjat dhe disa herë ka qenë pranë vdekjes. Autori e dhunonte dhe nuk e lejonte të dilte nga shtëpia.
Të njëjtën sjellje kishte edhe ndaj djalit 2.5 vjeç të çiftit te cilin autori e dhunonte herë pas here. Gruaja e re dhe fëmija u dërguan në një banesë sociale dhe u morën në mbrojtje prej autoriteteve. Ndaj autorit u ngritën akuza të rënda si plagosje e rëndë me dashje, pengmarrje, dhunë në familje, dhunë ndaj të miturve etj, të cilat do ti kushtojnë atij disa vite burg. Autori do të dërgohet në gjykatë paraditen e së martës.
