Deputeti i Partisë Demokratike, Gazment Bardhi, ka reaguar pas pranimit të fajësisë nga ish-agjenti i FBI-së, Charles McGonigal se ka fshehur informacionin nga Byroja Federale e Hetimit lidhur me faktin se ka marrë 225,000 dollarë nga ish-oficeri i inteligjencës shqiptare, Agron Neza.
Përmes një reagimi Bardhi kujton kallëzimin që ka bërë në SPAK për Edi Ramën dhe dosjen amerikane të ish-zyrtarit të lartë të FBI-së dhe i kërkon Prokurorisë së Posaçme të informojë se ku ndodhet me hetimet.
“Në 24 janar 2023 kam kallëzuar në SPAK Edi Ramën mbi dosjen amerikane të ish- zyrtarit të lartë të FBI-së, Charles McGonigal. Ai i ka shërbyer Edi Ramës për interesat e tij politikë dhe, si shpërblim, është paguar prej Edi Ramës me para të zeza.
Pranimi i fajësisë nga McGonigal, duke shpjeguar se marrëdhënien me Edi Ramën e krijoi për efekt të biznesit, bëjnë urgjente një përgjigje edhe nga drejtësia shqiptare.
Drejtësia amerikane ka provuar dhe ish zyrtari i FBI-së ka pranuar se në takimin me Edi Ramën në Shtator 2017, ai kishte shfaqur interes për një koncesion shumë të madh në fushën e naftës, me lidhje indirekt me gjigandin rus të naftës GAZPROM.
6 muaj pas këtij takimi, në Mars 2018, Ministria e Energjisë shpalli fitues për koncesionin e tre fushave naftëmbajtëse në jug të Shqipërisë, kompaninë Transoil Group AG, të lidhur me miqtë e McGonigal.
Gjykatat shqiptare kanë konstatuar se përzgjedhja e kompanisë në koncesionin e tre fushave naftëmbajtëse në jug të Shqipërisë u krye nën favorizim dhe shkelje të barazisë në tender
SPAK ka detyrimin që të informojë opinionin publik mbi fazën ku ndodhet hetimi mbi këtë cështje. Shqiptarët kanë të drejtë të dinë, nëse SPAK-u i ka kërkuar apo jo drejtësisë amerikane të dhënat e dosjes, si dhe t’i përgjigjet pritshmërisë së qytetarëve për barazi para ligjit”, thuhet në reagimin e Bardhit.
