Kryeministri Edi Rama ka debatuar me ambasadorin e Rusisë në OKB, Vasily Nebenzya, gjatë mbledhjes së sotme.
Shqipëria e përfaqësuar nga Rama drejton sot mbledhjen e Këshillit të Sigurimit të OKB-së, në të cilën bën pjesë edhe Rusia.
Gjatë fjalës së tij, kryeministri Rama tha se përfaqësuesi i Rusisë po provokonte dhe po fliste për tema që nuk kishin lidhje me takimin.
Nga ana tjetër, Nebenzya është shprehur duke iu drejtuar Ramës që të përmbahej nga vlerësimet politike dhe të mos fliste si kryeministri shqiptar, por si drejtues i mbledhjes.
Pjesë nga debati:
Nebenzya: Ju po veproni si kryetar i Këshillit të Sigurimit, nuk po flisni si përfaqësues i Shqipërisë. Objektivi juaj është të zhvilloni një takim siç sanksionohet në rregullore.
Rama: Sapo ju përgjigja pasi mu drejtuat si kryeministri shqiptar dhe pasi filluar të thonit gjëra të pasakta lidhur me atë çka është procedura këtu. Nëse nuk doni që t’ju përgjigjem në cilësinë e kryeministrit shqiptar, mos më provokoni.
Nebenzya: Zoti kryetar ju drejtohem vetëm si kryetar i Këshillit të Sigurimit, asnjëherë si kryeministër, ju lutem përmbahuni nga vlerësimet politike.
Rama: Folët për NATO-n, për faktin që Shqipëria është në NATO, për vendet që vijnë këtu, kjo nuk ka të bëjë fare me rolin tim në Këshillin e Sigurimit.
