BE dhe SHBA i janë kundërvënë edhe një herë Albin Kurtit duke marrë nominalisht në mbrojtje ndërmjetësuesin e dialogut mes Kosovës dhe Serbisë, Miroslav Lajcak, të cilin shefi i qeverisë në Prishtinë e ka akuzuar me një gjuhë të ashpër.
Kurti tha gjatë një konferencë shtypi të hënën se emisari Lajçak po ia mban krahun Beogradit zyrtar. “Lajçaku e Vuçiçi duket sikur të jenë koordinuar me një qëllim të vetëm, të bëjnë të pamundur një skenar ku marrëveshja zbatohet në tërësinë e saj. Ata po i japin jetë një skenari alternativ ku gjysma e marrëveshjes që përbën pjesën më të civilizuar fqinjësore dhe evropiane, të mos zbatohet asnjëherë” tha kryeministri kosovar duke nënkuptuar se synimi i tyre është vetëm themelimi i asocacionit të komunave serbe duke anashkaluar atë pjesë të planit franko gjerman që e obligon Serbinë të njohë ‘de facto” Kosovën. Albin Kurti që theksoi se kjo lojë ‘e mbyt marrëveshjen vazhdoi: “Kanë shkuar shumë larg në goditjen e Kosovës”. Nuk mund të shtrembërohet gjykimi im duke hedhur hi syve. Ose e zbatojmë gjithë marrëveshjen, ose nuk mund të zbatojmë vetëm ato që do Serbia. Kjo logjikë ka vdekur”.
Lexo me tej:
Andi Bushati: Nuk ka nevojë Albini për Kosovën, por shqiptarët për Kurtin
Mirëpo menjëherë pas këtyre deklaratave të forta edhe Brukseli edhe Uashingtoni janë solidarizuar me ish ministrain e jashtëm Sllovak, një vend që nuk e njeh Kosovën, Miroslav Lajcak. “BE-ja shpreh mbështetjen e plotë për përpjekjet e Përfaqësuesit të Lartë Josep Borrell në cilësinë e Lehtësuesit të Dialogut Beograd-Prishtinë, si dhe Përfaqësuesit Special të BE-së Miroslav Lajcak, dhe u kujton palëve se rruga evropiane e Kosovës dhe Serbisë kalon nëpër Dialogun e lehtësuar nga BE-ja dhe nëpërmjet normalizimit të marrëdhënieve të tyre. Të dy rrezikojnë të humbasin mundësitë për të përparuar në rrugët e tyre evropiane”, thuhet në komunikatën e Bashkimit Evropian.
Përkrahje për emisarin e BE-së, Miroslav Lajcak, kanë shprehur edhe Shtetet e Bashkuara të Amerikës. Departamenti Amerikan i Shtetit i ka vlerësuar punën e Lajcak duke thënë e njohin përpjekjet e palodhura të tij në kuadër të procesit të normalizimit Kosovë-Serbi.
“Ne (SHBA) mbetemi të angazhuar ngushtë me Kosovën, Serbinë dhe partnerët e BE-së në dialogun e lehtësuar nga Bashkimi Evropian. Falenderojmë dhe njohim përpjekjet e palodhura të Përfaqësuesit të posaçëm të BE-së, Miroslav Lajçak”, kanë thënë nga Departamenti Amerikan i Shtetit për Zërin e Amerikës.
Sekretet e Ohrit / Kurti rrëfen momentin kur Vuçiç përpak braktisi tryezën
Lajçak gjatë qëndrimit në Shtetet e Bashkuara të Amerikës ka darkuar edhe me këshilltarin e DASH, Derek Chollet, dhe emisarin për Ballkanin Perëndimor, Gabriel Escobar (foto poshte).
Ish-kryediplomati sllovak ka thënë se sa i përket situatës në Ballkanin Perëndimor, BE dhe SHBA janë në të njejtën linjë sa i përket rrugës përpara.
“Gjithmonë e dobishme e të rikonfirmojmë se ne ndajmë të njëjtin lexim të situatës në Ballkanin Perëndimor dhe ne jemi në të njëjtën linjë në lidhje me rrugën përpara”, ka shkruar Lajcak pas darkës me dy zyrtarë amerikanë të involvuar në dialogun Kosovë -Serbi.
Ekskluzive / Çfarë tha Albin Kurti ‘OFF” në Tiranë
Në Marrëveshjen Bazë me 11 nene dhe Aneksin për zbatimin e saj, Kosova dhe Serbia janë pajtuar në shkurt dhe mars të këtij viti. Por, marrëveshja nuk ka nisur të zbatohet.
Dokumenti, prej 11 nenesh, nuk përfshin njohjen reciproke për të cilën insiston Kosova, por kërkon nga Kosova dhe Serbia që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat. Po ashtu palët zotohen se do të zbatojnë marrëveshjet e arritura më herët në procesin e dialogut duke nënkuptuar këtu krijimin e asocacionit të komunave me shumicë serbe.
Sipas burimeve të Radios Evropa e Lirë në BE, Kurtit dhe Vuçiçit i është propozuar të fillojnë me negociatat për krijimin e asocacionit dhe pikërisht kjo gjë ka shkaktuar mosdakordësinë e kryeministrit kosovar që bëri që ai të shpërthejë më pas edhe kundër ndërmjetësit për dialogun Miroslav Lajçak.
