Mediat malazeze kanë dhënë detaje të reja në lidhje me një sasi të madhe kanabisi të zbuluar brenda një kamioni që hyri në vend nga Shqipëria nëpërmjet pikës doganore të Hanit të Hotit. Agjencia e lajmeve “Vijesti” shkruan se operacioni u zhvillua nga policia malazeze dhe Drejtoria e Doganave.
Nga kontrolli i kamionit me targa shqiptare u zbulua 497 kilogramë marijuanë të llojit skunk. Në pranga u vunë shqiptarët Ilirjan dhe Kristi Orhani, 60 dhe 24 vjeç, babë e bir që shoqëronin kamionin. Ata akuzohen për veprat penale prodhim, posedim dhe shpërndarje të paautorizuar të narkotikëve.
Sipas të njëjtave burime kamioni është vënë nën kontroll në bazë të analizës së riskut, por edhe nga të dhënat e inteligjencës informative. Droga ishte e ndarë në 185 pako dhe ishte fshehur mes paletave të drurit.
Destinacioni i ngarkesës ishte Austria. Kamioni kishte kaluar pa probleme në doganën shqiptare ku edhe ishte vulosur. ©LAPSI.al
