Një pallat 10-katësh u përfshi nga një zjarr masiv mesditën e së enjtes në “Rrugën e Kavajës” në Tiranë. U desh më shumë se 4 orë që zjarrfikësit të neutralizonin zjarrin.
Drejtori i Repartit Zjarrfikës në Tiranë, Shkëlqim Goxhaj tha se fillimisht zjarri ka rënë në katin e dytë dhe më pas nëpërmjet fasadës është përhapur me shpejtësi deri në katin e 10-të.
Kati i fundit i pallatit ishte ndërtuar me materiale të djegshme dhe thuajse është shkrumbuar plotësisht. Fatmirësisht nuk pati persona të lënduar. Në katin e katërt ka qenë një grua shtatzënë me dy fëmijë dhe nënën e saj. Fatmirësisht kanë arritur që të dalin jashtë sa më shpejt.
Raportohet se për këtë ngjarje është marrë në pyetje nga policia edhe administratori i pallatit shumë-katësh si edhe disa banorë. Shkaqet e zjarrit mbeten të paqarta. Dëmet materiale ndërkohë janë mjaft të mëdha.
E tërë zona u mbulua nga shtëllunga tymi. Ndërtues i pallatit është Tanush Mehilli. Pallati ka vetëm 1 vit që është ndërtuar, ndërsa banorët në katin e pestë kishin vetëm një muaj që kishin hyrë në këtë pallat. ©LAPSI.al
