Deri para pak muajsh, qeveria premtonte se Unaza e madhe e Tiranës do të mbaronte në vitin 2024. Por, sikurse ka ndodhur edhe shumë herë të tjera me Unazën, as ky premtim nuk do të mbahet.
Drejtori i Autoritetit Rrugor Shqiptar tha më 31 gusht se unaza mbaron në vitin 2025. Por çfarë ishte thënë më parë?
Vetë Ervis Berberi, drejtuesi i ARRSH-së, më 16 mars tha se unaza mbaron në vitin 2024.
Edhe Erion Veliaj, tre javë para zgjedhjeve lokale, tha se unaza mbaron në vitin 2024.
Ministrja e Infrastrukturës, Belinda Balluku shkonte edhe më larg. Më 16 shtator 2021 premtonte që unaza mbaronte në vitin 2023.
Megjithatë këto premtime duket se kanë rënë në tokë. Unaza e madhe është kthyer në një projekt të cilit fundi ende nuk i dihet.
Një fact-check që Lapsi.al bëri në korrik të këtij viti, zbuloi se edhe në një pjesë ku kryeministri Rama pretendonte se puna kishte përfunduar, një vit më pas rruga ishte ende kantier. ©Lapsi.al
