Në një fitore të rëndësishme për luftën kundër drogës, forcat e zbatimit të ligjit në Amerikën Latine dhe Evropë kanë shkatërruar një nga organizatat më aktive të trafikut të drogës në Brazil, e cila kishte “përmbytur” gjithë Evropën me ngarkesa shumëtonëshe kokaine, pjesë e rëndësishme e të cilës ishte edhe një shqiptar.
Më 30 mars, në Brazil u kryen aksione të njëkohshme me mbështetjen e Europolit për të çmontuar grupin kriminal që arriti nga Paraguaj në Evropë.
Në total u arrestuan 15 persona dhe u sekuestruan pasuri në vlerë prej mbi 80 milionë euro.
Gjatë hetimeve u sekuestruan mbi 17 ton kokainë të lidhur me këtë organizatë kriminale, me një vlerë nëse do të hidhej në treg, rreth disa miliarda euro.
I njohur si Operacioni HINTERLAND, ky hetim i gjatë dyvjeçar arriti kulmin me një sërë veprimesh të kryera njëkohësisht më 30 mars për të rrëzuar të gjithë infrastrukturën kriminale të lidhur me këtë grup.
Ndaj organizatës kriminale përgjegjëse për dërgesat e shumta të kokainës, furnitorëve të saj si dhe strukturës së pastrimit të parave, u morën masa përmbarimore.
Kjo ditë veprimi u koordinua nga dy qendra komanduese në Porte Alegre dhe Rio Grande (Brazil).
Operacioni në Brazil rezultoi në:
37 kontrolle pronash
15 arrestime
Sekuestrimi i 173 automjeteve dhe një avioni
Ngrirja e llogarive bankare të 147 individëve dhe 66 kompanive
Përveç kësaj, në Spanjë po ndërmerren hapa për gjetjen dhe sekuestrimin e aseteve që u përkasin anëtarëve të organizatës kriminale.
Operacioni i udhëhequr nga inteligjenca
Hetimi filloi në Brazil pasi Policia Federale e Brazilit mori informacione nga Dogana Gjermane për një sekuestrim në dhjetor 2020 të 316 kilogramëve kokainë në Hamburg (Gjermani). Informacioni fillestar sugjeroi se një kompani braziliane po përdorej për transportin e kokainës nga Brazili në Evropë.
Bazuar në analizën e kryer nga Europol dhe autoritetet franceze (OFAST), Policia Federale e Brazilit ishte në gjendje të zbulojë plotësisht rrjetin kriminal që deri atëherë kishte funksionuar kryesisht e fshehtë.
Hetuesit ishin në gjendje të zbulonin se si kjo organizatë braziliane e trafikut të drogës importonte kokainë nga Paraguai të fshehur në kamionë, përpara se ta eksportonte në Evropë.
Arrestimi i parë u krye në tetor 2022 nga Policia Federale e Brazilit. Një objektiv prioritar u arrestua në Paraguaj për përfshirjen e tij të supozuar në drejtimin e logjistikës midis Paraguajit dhe Brazilit, dhe negocimin direkt me furnizuesit në Paraguaj dhe Bolivi.
Raundi i fundit i arrestimeve më 30 mars ishte kulmi i shumë muajve të vëzhgimit, mbledhjes së informacionit dhe koordinimit midis autoriteteve të ndryshme të zbatimit të ligjit të përfshirë në përgatitjen e aksionit.
Mbështetja e Europolit
Qendra Evropiane për Krimet e Organizuara të Rënda të Europolit e ka mbështetur këtë rast që nga fillimi, duke bashkuar vendet e përfshira për të zbuluar përmasat aktuale të aktivitetit kriminal, për të krijuar një strategji të përbashkët dhe për të organizuar shkëmbimin e provave të nevojshme për përgatitjen e fazës përfundimtare të hetimit.
Përveç kësaj, Europol ka ofruar zhvillim dhe analizë të vazhdueshme të inteligjencës për të mbështetur hetuesit në terren.
Autoritetet e mëposhtme morën pjesë në këtë hetim:
Brazil: Policia Federale (Polícia Federal)
Francë: Policia Kombëtare (Police Nationale – OFAST)
Gjermani: Dogana (Zoll)
Spanjë: Garda Civile (Guardia Civil)
EMRAT:
Operacioni Hinterland përcaktoi Rodrigo Alvarenga Paredes si një nga drejtuesit e organizatës së drogës në Paraguaj.
Media braziliane “O Globo” zbulon sot emrin e një shqiptari të përfshirë në këtë organizatë.
“Duke hyrë në mesazhet e Sky ECC, hetuesit gjetën blerësin kryesor të organizatës të drogës në Evropë: shqiptarin Armando Pacani, 39 vjeç, i lidhur me një klan në Ballkan, sipas PF (Federal Police).
Ai përmendet si pronari i ngarkesës së dërguar përmes Afrikës Perëndimore. Të dhënat e imigracionit tregojnë se Pacani hyri në Brazil në janar 2019 dhe u largua në gusht 2020, me një fluturim të Emirates nga São Paulo në Dubai.
Pacani është në arrati. Europol dyshon se ai ndodhet në Dubai, në Emiratet e Bashkuara Arabe. Në një deklaratë, avokati i tij, Eduardo Maurício, deklaroi se klienti i tij është i pafajshëm dhe pretendoi se Operacioni Hinterland, urdhri i arrestit dhe përfshirja e tij në listën e kërkuar të Interpolit, bazohen në prova të paligjshme që burojnë nga mesazhet telefonike në Sky ECC.
Sipas Maurício, “kompania Sky ECC” pretendon se autoritetet pushtuan softwerin e komunikimit në një mënyrë të paligjshme dhe abuzive, gjë që paraqet një shkelje të qartë të normave dhe parimeve kushtetuese, duke kërkuar shpalljen e pavlefshme të të gjitha provave”, thuhet në një media braziliane.
