Kancelari gjerman Olaf Scholz publikoi një foto të tij me një fashë syri pas një rrëzimi duke vrapuar. Incidenti ndodhi të shtunën pranë shtëpisë së tij në Potsdam, pranë Berlinit. Ai anuloi të gjitha takimet zgjedhore të së dielës për shkak të aksidentit, por tha se do të marrë pjesë normalisht në angazhime duke përfshirë fjalimet e shumta publike të planifikuara për ditët e ardhshme. Në një postim në X, (dikur Twitter), ai tha se "duket më keq se sa është".
Rënia nuk ishte serioze, por në foto shfaqen disa mavijosje rreth syrit, si dhe në hundë e mjekër. Zëdhënësi i tij tha se kancelari ishte në "humor të mirë", por kishte mjaft shenja. Ai tha se Scholz e publikoi foton në mënyrë që njerëzit të mësoheshin se si do të duket ai në javët e ardhshme. Në postimin në X, ai tha se ishte i gatshëm "të priste memet".
Disa përdorues të mediave sociale me shaka i lidhën lëndimet me grindjet brenda koalicionit qeverisës. Ndërsa faqja e internetit e qytetit të Këlnit, i cili pret një festë të madhe karnavalesh vjetore sugjeroi që argëtuesit mund të vinin vitin e ardhshëm të veshur si "Pirati Olaf". Duke gjykuar nga komentet e shumta pozitive në internet, votuesve gjermanë duket se u pëlqen imazhi i ri prej pirati i kancelarit Scholz. Ose ndoshta ata thjesht u befasuan mënyra se si e trajtoi çështjen kancelari që përgjithësisht konsiderohet një komunikues i dobët.
Në një sondazh nga stacioni televiziv publik ZDF në gusht, 72% thanë se Scholz shmang dhënien e përgjigjeve konkrete për pyetjet më shpesh sesa politikanët e tjerë. Në një anketë tjetër të ZDF-së në gusht, 51% e votuesve ishin të pakënaqur me të, krahasuar me 43% të atyre që ishin të kënaqur. Këto janë vlerësime të ulëta për një kancelar gjerman. Por problemi kryesor i zotit Scholz është se ai drejton një koalicion qeverisës trepalësh, në të cilin secila parti ka qëllime dhe ideologji shumë të ndryshme.
Përballë krizave të shumta, nga inflacioni e deri te lufta e Rusisë në Ukrainë, ky koalicion i pakëndshëm është acaruar seriozisht. Koalicioni i tij ka plane ambicioze për të reformuar Gjermaninë dhe mbështetësit e tij thonë se në dy vitet e fundit qeveria e Scholz ka bërë më shumë ndryshime sesa bëri Angela Merkel në 16 vjet. Por grindjet shpërthejnë rregullisht midis Partisë Liberale Demokrate të Lirë (FDP) që kërkon taksa të ulëta për biznesin dhe “Të gjelbërve” me prirje të majta. Sipas sondazhit të fundit të së dielës, nëse zgjedhjet do të mbaheshin tani, qeveria do të fitonte vetëm 38% të votave dhe do të humbiste shumicën.
SPD e kancelarit ka rënë në 18% në sondazhe, katastrofike për një parti që dikur arrinte 40% në zgjedhje. Ngushëllimi i vetëm i zotit Scholz është se votuesit nuk duket se po zgjedhin as konservatorët e opozitës. Kundërshtari i tij kryesor për postin kryesor të Gjermanisë, lideri konservator Friedrich Merz, është edhe më i papëlqyer. Duke pasur parasysh gjendjen e tmerrshme në politikën gjermane për momentin, votuesit janë ndoshta mirënjohës për çdo lloj lehtësimi të lehtë që zbulon se Olaf Scholz është njeri me sens humori. ©LAPSI.al
