A mund ta imagjinoni që të qëndroni të martuar me dikë që nuk flet kurrë me ju? Kjo është pikërisht ajo që ndodhi mes çiftit japonez Otou dhe Yumi Katayama nga rajoni i Nara. Otou Katayama ka marrë tashmë vëmendje në mbarë botën pasi nuk i foli asnjë fjalë gruas së tij për rreth 20 vjet. Ai arriti ta bënte këtë teksa jetonte bashkë me të dhe 3 fëmijët e tyre në të njëjtën shtëpi. Ai kaloi nga një bashkëshort “i dashur” në një “të ftohtë” mesa duket brenda natës.
Sipas fjalëve të vetë Otou shkak u bë "xhelozia" e tij për kohën që ajo kalonte me fëmijët e tyre në vend të tij. Yumi, gruaja e tij, u përpoq vazhdimisht të fliste me të gjatë dy dekadave të fundit. Por ajo vijonte të merrte si përgjigje vetëm një tundje me kokë ose ndonjë mërmëritje si përgjigje. Në vitin 2017, djali 18-vjeçar i çiftit, Yoshiki, vendosi të ndërhyjë. Ai kontaktoi një emision televiziv lokal dhe u kërkoi ndihmë për të rregulluar marrëdhënien e ftohtë mes prindërve të tij.
Programi vendosi që çifti të takohej në një stol në parkun Nara, i njëjti vend ku ata patën takimin e tyre të parë, dekada më parë. Otou Katayama pranoi gabimet e sjelljes së tij ndaj saj. “Unë mendoj se nuk ka kthim prapa tani” – tha ai. Më pas ai shprehu mirënjohje ndaj gruas së tij për përpjekjet e saj në kujdesin për familjen e tyre gjatë dy dekadave të fundit.
“Ishe shumë e shqetësuar për fëmijët. Yumi, deri tani ke duruar shumë vështirësi. Unë dua që ju të dini se unë jam mirënjohës për gjithçka” – tha Otou. Kjo ishte biseda e parë mes prindërve të tij që Yoshiki kishte parë ndonjëherë. Trupa e emisionit televiziv nuk mund të mos përlotej në skenën domethënëse përpara tyre. Në fund, Otou Katayama kërkoi lejen e gruas së tij për të qenë së bashku si një bashkëshort i vërtetë. ©LAPSI.al
