Gjatë intervistës për Ekathimerini, kryeministri i Shqipërisë Edi Rama tha për gazetarin grek Pavlos Papadopoulos se shkak për sulmin që i bëri publikisht Fredi Belerit gjatë fushatës për zgjedhjet lokale ishin deklaratat e kandidatit për helenizimin e Himarës.
“Arsyeja pse u tregova i ashpër me të ishte se ai bëri disa deklarata shumë, shumë të papranueshme, të tilla si ‘do të çonte përpara procesin e ndërprerë të helenizimit të Himarës’”.
Ky pretendim i Ramës nuk përputhet me faktet. Kryeministri i referohet një interviste të Belerit për median greke Protothema para zgjedhjeve të 14 majit.
Por intervista e Belerit është publikuar më 7 maj.
Ndërsa sulmet e Edi Ramës nisën më datë 6 maj në një miting në Himarë.
Për më tepër, Beleri pretendon se intervista e tij në gjuhën greke u përkthye gabim në shqip. Ai tha se nuk foli për “helenizim”, por për “helenizmën” që është një referim për ata grekët që jetojnë kudo brenda dhe jashtë kufirit grek.
Arrestimi i Fredi Belerit për blerje votash në Himarë dy ditë para zgjedhjeve ka acaruar marrëdhëniet mes Shqipërisë dhe Greqisë.
I vënë në shënjestër të politikës dhe mediave greke, Rama i kërkoi intervistë gazetarit të Ekathimerinit për të shpjeguar versionin e tij të ngjarjes.
©LAPSI.AL
