Kryeministri Edi Rama e nisi konferencën me gazetarët duke lavdëruar PPP e sterilizimit, por pas ngulmimit të gazetares Ambrozia Meta e cila i kujtoi se mund ta kishte parandaluar korrupsionin, Rama u detyrua të distancohet nga Beqaj, duke i bërë thirrje SPAK "t'i nxjerrë ujin e zi" abuzimeve. Gazetarja i kujtoi një letër me të cilën bashkimi i kompanive që nuk e fituan garën në PPP i kishte dërguar kryeministrit Rama duke e njoftuar për abuzimet me garën.
"Nëse në luftën për qëllime të përbashkëta ka individë që shfrytëzojnë të qënit në front për përfitime të tyre jo të përbashkëta për qëllime veta të paligjshme. Këto i trajton drejtësia dhe lufta ime për reformën në drejtësi nuk ka qenë luftë me mullinjtë e erës, as për ta pasur këmbëkryq ku secili bën prokurorin e gjykatësin. Këto që pyesni ju janë detyrë e dikujt tjetër, që për mua po e bën mirë detyrën. Të gjithë ju, jeni të lirë t’i shprehni mendimet, unë nuk jam i lirë t’i ndaj mendimet. Nuk jemi ne në këtë debat. Nuk na keni. Mblidhni njerëz në ekrane. Bëhuni me ata që nuk kanë punë tjetër vetëm se të merren me llafe. Puna jonë është pushteti ekzekutiv. Nuk jemi pushtet gjyqësor. Pjesë e punës tonë është të kemi pushtet gjyqësor. Unë i inkurajoj t’i nxjerrin ujin e zi cdo rasti, çdo aktiviteti. Nëse ka ujë të zi, t’ia nxjerrin dhe unë jam falenderues" tha Rama.
Për abuzimin me dhjetëra miliona euro janë në burg ish-zv.ministri i shëndetësisë Klodian Rrjepaj dhe biznesmeni Ilir Rrapaj, ndërsa po hetohen ish-ministri Ilir Beqaj dhe antarët e komisionit që miratoi procedurat.
