CNN ka shkruar sot se avokati i Charles McGonigal, ish-zyrtari i lartë i FBI-së i akuzuar për fshehjen e 225,000 dollarëve që ka marrë nga një ish-punonjës i inteligjencës shqiptare, tha se ai pret që çështja kundër klientit të tij në Uashington, DC, të zgjidhet pa dalë në gjyq.
McGonigal, i cili doli në pension në vitin 2018, u akuzua në janar në dy aktakuza të veçanta në Nju Jork dhe DC për shërbimet që i kishte kryer oligarkut rus Oleg Deripaska dhe për paratë e padeklaruara që mori nga Agron Neza, shqiptaro-amerikani që e prezantoi me shumë zyrtarë të lartë në Shqipëri, përfshirë kryeministrin Edi Rama.
Avokati i McGonigal, Seth DuCharme, vuri në dukje se të pandehurit kanë dy zgjedhje - të pranojnë fajin ose të shkojnë në gjyq - dhe tha se kishte një "shans të mirë që çështja do të zgjidhet" pa pasur nevojë të shkohet në gjyq. Më shumë për qëndrimin e McGonigal do të mësohet pas të hënës së parë të shtatorit.
McGonigal është deklaruar i pafajshëm për të dyja aktakuzat, por komentet e DuCharme sugjerojnë se prokurorët e qeverisë dhe avokatët e McGonigal mund të punojnë së bashku për një marrëveshjeje për pranimin e fajësisë në këtë rast, megjithëse DuCharme vuri në dukje se ishte i interesuar të shihte pjesën tjetër të zbulimit të prokurorit në këtë rast, i cili përfshin dokumente të mbrojtjes kombëtare që ende kërkojnë disa redaktime.
Lexo edhe: Çfarë fshehu Rama nga leximi i akt-akuzës për McGonigal
Lexo edhe: Afera McGonigal/ Ku ndryshon narrativa e Ramës nga ajo e FBI-së
Lexo edhe: Detajet/ Washington Post: McGonigal i zhytur deri në fyt në pakt sekret me Ramën
Është e paqartë se si do të dukej një marrëveshje për pranimin e fajësisë midis prokurorëve dhe McGonigal dhe për cilat akuza, në fund të fundit, ai mund të deklarohet fajtor.
Gjyqtarja Colleen Kollar-Kotelly caktoi një seancë tjetër për 13 shtator.
"Shpresojmë se do të kemi një përditësim të mirë për ju herën tjetër që do t'ju shohim," i tha DuCharme Kollar-Kotelly.
Gjatë vizitës së tij në Shqipëri, Charles McGonigal pati takime me Edi Ramën. Sipas dosjes së FBI-së, McGonigal nxiti hapjen e një hetimi për Lulzim Bashën për çështjen e financimit të vizitës së tij në SHBA. McGonigal u takua me shumë zyrtarë të tjerë shtetërorë, mes të cilëve edhe Tom Doshi që i kërkoi një hetim nga FBI për dyshimet që kishte se donin ta vrisnin.
