Pas tre muajsh e gjysmë konflikti të përgjakshëm në Sudan, 4 milionë njerëz janë detyruar të largohen nga shtëpitë e tyre dhe 20 milionë të tjerë janë në rrezik nga uria.
“Më shumë se 20.3 milionë njerëz, ose 42% e popullsisë” të Sudanit, një nga vendet më të varfra në botë, po përballen me “pasiguri akute ushqimore”, tha Organizata e Kombeve të Bashkuara për Ushqimin dhe Bujqësinë (FAO).
Sipas raportit nga OKB, rreth 930,000 njerëz kanë ikur jashtë vendit për t’i shpëtuar luftës, ndërsa të zhvendosurit brenda vendit arrijnë në 3 milionë.
FAO theksoi se kriza e ushqimit po përkeqësohet me lëvizjet e popullsisë për shkak të përleshjeve midis ushtrisë së gjeneralit Abdel Fattah al-Burhan dhe Forcave paraushtarake të Mbështetjes së Shpejtë të Gjeneralit Mohamed Hamdan Daghlo. Infrastruktura është shkatërruar që nga lufta dhe një në tre sudanez tashmë janë të uritur. Më shumë se gjysma e banorëve kanë nevojë urgjente për ndihmë humanitare për të mbijetuar, ndërsa OKB-ja dhe organizatat joqeveritare thonë se nuk kanë qasje tek këta njerëz.
Sipas FAO, 6.3 milionë sudanezë janë tashmë në një “situatë emergjente” (faza 4) për sa i përket sigurisë ushqimore, siç kategorizohet nga OKB-ja. Faza 5, niveli më i lartë, korrespondon me urinë. Në Khartoum, luftimet janë një dukuri e përditshme për miliona njerëz që janë mbyllur në shtëpitë e tyre pa ujë, ushqim ose energji elektrike në vapën e madhe, shkruajnë mediat e huaja.
Më herët sot, një zëdhënës i ushtrisë i tha televizionit se sulmet ajrore kishin vrarë ose plagosur dhjetëra kryengritës në jug të Khartoum. Në vitin 2021, të dy gjeneralët së bashku dëbuan politikanët me të cilët kishin ndarë pushtetin pas përmbysjes së diktatorit islamik Omar al-Bashir në vitin 2019. Por që atëherë ata kanë rënë, me Daghlo që akuzon ushtrinë se kërkon të rivendosë anëtarët e partisë tashmë të ndaluar të Bashirit. dhe se po “konspironte” me regjimin e kaluar.
