Lizzo ka reaguar për padinë e ngrejtur ndaj saj nga ish-balerinat.
"Këto ditët e fundit kanë qenë jashtëzakonisht të vështira dhe zhgënjyese," tha fituesja e Grammy, në një deklaratë të postuar në mediat sociale. “Etika, morali dhe respekti ndaj punës janë vënë në pikëpyetje. Zakonisht unë zgjedh të mos përgjigjem ndaj akuzave të rreme, por këto janë aq të pabesueshme sa duken dhe tepër të egra për të mos u adresuar.” Lizzo tha se pretendimet "të sensacionalizuara" erdhën nga ish-punonjës të cilët "tashmë e pranuan publikisht" se sjellja e tyre gjatë turneut me të kishte qenë "e papërshtatshme dhe joprofesionale".
Ajo shpjegoi se me "pasionin" e saj vjen "puna e vështirë dhe standardet e larta", duke pranuar se duhet "të marrë vendime të vështira". “Nuk është kurrë qëllimi im të bëj dikë të ndihet keq ose sikur nuk vlerësohet si pjesë e rëndësishme e ekipit.”
Këngëtarja u shpreh se nuk po përpiqej të shfaqej si "viktimë", por iu lut fansave dhe ndjekësve të saj të dinin se ajo nuk është "e keqja" që është portretizuar në ditët e fundit. “Unë jam shumë e hapur me seksualitetin tim, por nuk mund të pranoj apo lejoj që njerëzit ta përdorin atë për të më bërë të jem diçka që nuk jam”, shkroi ajo. “Nuk ka asgjë që e marr më seriozisht sesa respekti që meritojmë si gra në botë.”
Lizzo shtoi se e di se si ndihet "të tallesh për peshën trupore dhe absolutisht nuk do ta kritikonte apo largonte një punonjës për shkak të peshës". “Jam e lënduar, por nuk do të lejoj që puna e mirë që kam bërë në botë të errësohet nga kjo”, përfundoi artistja. “Dua të falënderoj të gjithë ata që më kanë ndihmuar për të më ngritur lart gjatë kësaj kohe të vështirë.”
