Lapsi.al zbardh më shumë detaje nga shkarkimi i beftë një ditë më parë i ministres së Financave, Delina Ibrahimaj, shkarkim që më pas u mohua nga vetë ministrja dhe kreu i qeverisë Edi Rama. Por nëse shkarkimi formal i Ibrahimajt është mohuar, përplasja në mbledhjen e qeverisë është fakt.
Një burim qeveritar i tregoi Lapsi.al më shumë detaje për sherrin mes Belinda Ballukut dhe Delina Ibrahimajt. Zv.kryeminstrja i kërkoi llogari Ministrës së Financave për dy projekte që kishin ngecur. Fjala ishte për projektin e hekurudhës Vorë-Hani Hotit që financohet me fonde ndërkombëtare dhe për Bypassin e Tiranës. Delina Ibrahimaj i argumentoi kufizimet buxhetore zëvendëses së Edi Ramës, por Belinda Balluku reagoi ashpër ndaj saj dhe nuk e pranoi justifikimin. Pas përplasjes verbale në mbledhje qeverie, Balluku shkoi në zyrën e Ramës për të treguar çfarë kishte ndodhur.
Më pas ishte Rama që në inat e sipër thirri një mbledhje tjetër urgjente të qeverisë, ku iu komunikua shkarkimi Delina Ibrahimajt. Pas këtij momenti lajmi rrodhi fillimisht Albanian Post të Baton Haxhiut e më pas Top Channel. Por ndërsa mediat u mbushën me lajmin e shkarkimit, duket se Rama reflektoi në momentet e fundit me ndërhyrjen e njerëzve të tij të afërt, për të mos e komunikuar këtë vendim për shkak të jehonës në publik. Aq më tepër që vinte pak ditë pasi kishte shkarkuar në mënyrë demonstrative, Bledi Çuçin nga posti i Ministrit të Brendshëm.
Nisur nga kjo, Edi Rama dhe Delina Ibrahimaj u detyruan të mos e pranonin shkarkimin teksa u pyetën nga mediat kur po hynin në Asamblenë e PS-së. Por shkarkimi i Ministres së Financave është fakt, thjesht koha kur do të komunikohet ky vendim me sa duket është shtyrë për një afat tjetër. Edhe media që e publikoi fillimisht, në një shkrim të mëvonshëm i qëndroi lajmit të shkarkimit. Mbetet për t'u parë se çfarë do të ndodhë pas "ngujimit" dy ditor në Tepelenë, aty ku kabineti qeveritar është mbledhur për një retreat. A do t'i presë tani "kokat" e disa ministrave Edi Rama apo do të presë muajin shtator?! ©LAPSI.al
