Mesditën e kësaj të mërkure një vajzë e re u shfaq e zhveshur para prokurorisë së Tiranës duke shokuar kalimtarët por edhe punonjësit e institucionit. Disa prej tyre dolën të alarmuar në oborr për të kuptuar çfarë po ndodhte, ndërsa një pjesë e kalimtarëve nisin të bënin foto dhe video.
Mësohet se vajza është një shtetase nga Kolumbia e cila ka vendosur të protestojë duke u zhveshur nudo për shkak të një çështjeje që kishte në prokurori dhe për të cilën i ishte bllokuar pasaporta.
Ajo është kapur me 5 gr kokainë dhe për shkak të zvarritjes së procesit është bllokuar në Shqipëri. Për shkak të zvarritjes të gjyqit, kolumbiana nuk merr dot pasaportën dhe për këtë shkak ka zgjedhur të zhvishet para prokurorisë. Ka qëndruar aty për disa minuta dhe më pas është larguar.
Pas reformës në drejtësi, në Shqipëri ka gjithnjë e më pak prokurorë dhe gjyqtarë, ndërsa një pjesë e gjykatave dhe prokurorive janë mbyllur fare duke shkaktuar zvarritje të shumta për qytetarët. Në ndryshim nga vajza nga Kolumbia, shqiptarët janë mësuar me mungesën e drejtësisë dhe kanë zgjedhur forma të tjera për të bërë vetëgjyqësi.
