Një 30-vjeçar është plagosur me armë zjarri në Shijak. Ngjarja dyshohet se ka ndodhur pas një konflikti për motive të dobëta, ndërsa policia ka shpallur në kërkim autorin e dyshuar, një 18 vjeçar. Si për ironi të fatit ngjarja shënohet pak orë pas vizitës së Ministrit të ri të Brendshëm në Drejtorinë e Policisë Durrës, Taulant Balla.
Blutë e Shijakut thonë se kanë ngritur pika kontrolli dhe vijojnë kontrollet në zonë dhe në ambiente të ndryshme ku dyshohet se mund të jetë fshehur 18-vjeçari.
“Rreth orës 13:20, në Shijak, dyshohet se gjatë një konflikti për motive të dobëta, shtetasi K. Ç., 18 vjeç, ka plagosur me armë zjarri pistoletë shtetasin S. B., 30 vjeç, i cili ndodhet në spital, në kujdesin e mjekëve, jashtë rrezikut për jetën.
Shërbimet e Policisë, sapo kanë marrë njoftim, kanë shkuar menjëherë në vendngjarje dhe falë veprimeve të shpejta kanë identifikuar autorin dhe janë vënë në ndjekje të tij.
Janë ngritur pika kontrolli dhe vijojnë kontrollet në zonë dhe në ambiente të ndryshme ku dyshohet se mund të jetë fshehur 18-vjeçari”, thuhet ne njoftim.
Grupi hetimor vijon punën për zbardhjen dhe dokumentimin e plotë të rrethanave të ngjarjes.
