Imazhet kimike zbulojnë detaje të fshehura në pikturat egjiptiane. Studiuesit duke përdorur një teknikë të fundit kanë zbuluar detaje të fshehura në dy piktura të lashta egjiptiane në Nekropolin Theban, pranë lumit Nil, që datojnë më shumë se 3000 vjet më parë.
Pikturat ndodhen brenda varreve, në kapela ku njerëzit mund të mblidheshin për të përkujtuar të vdekurit.
Duke përdorur teknologjinë portative të imazhit kimik, studiuesit identifikuan ndryshime të bëra nga artistët që janë të rralla në pikturat egjiptiane, që zakonisht mendohet se janë produkt i flukseve të punës shumë të formalizuara.
Studimi po përpiqet të përmbysë edhe traditën në egjiptologji, pasi analiza është bërë në varre me pajisje portative të avancuara, ndërsa shumica e studimeve kryhen tradicionalisht në muze apo laboratorë.
"Ajo që është e re është mënyra se si ne po përpiqemi t'i përdorim ato mjete," tha Philippe Martinez, një egjiptolog në Universitetin e Sorbonës në Paris dhe autori kryesor i studimit të botuar të mërkurën në revistën PLOS ONE.“Mënyra se si janë trajtuar më parë këto vepra arti ka qenë kryesisht, thjesht analoge, dhe ato janë marrë disi si e mirëqenë – askush nuk i ka parë realisht nga këndvështrimi i artistëve. Ne duam të kuptojmë se si janë bërë këto piktura.”
