Tre oficerë policie u vranë dhe 10 persona të tjerë u plagosën të martën në një sulm “të paprecedentë” me eksploziv në shtetin meksikan të Jalisco, tha guvernatori i shtetit.
Oficerët e policisë dhe stafi nga zyra e prokurorisë së shtetit “pësuan një sulm frikacak me mjete shpërthyese, i cili paraprakisht shkaktoi vdekjen e tre kolegëve të policisë bashkiake dhe Prokurorisë, si dhe 10 persona të plagosur”, tha Guvernatori Enrique Alfaro në Twitter.
“Kjo është një ngjarje e paprecedentë që tregon se çfarë janë në gjendje këto grupe të krimit të organizuar”, shtoi guvernatori. “Ky sulm përfaqëson gjithashtu një sfidë kundër shtetit meksikan në tërësi”.
Shteti perëndimor është baza e operacioneve të kartelit Jalisco New Generation, një nga grupet më të fuqishme të trafikut të drogës në Meksikë, i cili ka një prani në një pjesë të madhe të vendit dhe është i përfshirë në mosmarrëveshje me organizatat e tjera të drogës.
Alfaro tha se kabineti i sigurisë i Jalisco ishte duke hetuar sulmin, i cili nuk i është atribuar një organizate të caktuar kriminale.
Sipas raportimeve të rrjetit lokal Televisa, shpërthimi ka ndodhur pranë një automjeti në të cilin po udhëtonin zyrtarët e sigurisë.
Ndërsa sulmet me bomba me makina janë të rralla në Meksikë, një makinë bombë në qershor vrau një anëtar të Gardës Kombëtare dhe plagosi të tjerë në Guanajuato, një shtet tjetër i goditur rëndë nga dhuna e lidhur me kartelin.
Gjithashtu të martën, 13 personel sigurie që ishin zënë rob një ditë më parë nga protestuesit në shtetin jugor të Guerrero, u liruan pas negociatave me autoritetet.
Zyrtarët thanë se protestuesit ishin infiltruar nga një grup kriminal. Guerrero ka duruar vite të tëra dhune të lidhura me luftërat në terren midis karteleve të drogës.
Që nga nisja e një ofensive të diskutueshme ushtarake kundër drogës në vitin 2006, Meksika ka regjistruar më shumë se 340,000 vrasje dhe rreth 100,000 zhdukje, kryesisht të atribuuar organizatave kriminale.
