Prej kohësh Erion Veliaj e ka pompuar Piramidën e Tiranës si projektin e tij primar. Kreybashkiaku socialist, tashmë i zgjedhur për herë të tretë, organizoi një event hollivudian tre ditë para zgjedhjeve për t'a inaugurar Piramidën në qendër të Tiranës. Problemi qëndron se kanë kaluar dy muaj që nga inaugurimi, por ndërtimi i Piramidës nuk ka përfunduar ende.
Prozhektorë të mëdhenj, drita LED përgjatë shkallëve që i zunë vendin rrëshqitësve të preferuara të të rinjve të Tiranës post-komuniste, karrige të vendosura në rrathë dhe qindra freshistë të pranishëm, shumë prej tyre në majë të piramidës.
Më 11 maj, vetëm tre ditë para zgjedhjeve Erion Veliaj u ngjit në podium, falenderoi të madh e të vogël, nga kryeministri deri tek punëtori i thjeshtë. Teksa fliste, thuajse realisht dukej i lumtur për këtë inaugurim.
"Sot ne nuk hapim vetëm një ndërtesë, jo vetëm një stoli, jo vetëm një belvedere për Tiranën, një pikë për tu "instagramuar". Sot hapim njëkohësisht edhe qëndrën më të madhe digjitale në Ballkan për të rinjtë dhe të rejat e Shqipërisë" - u shpreh Veliaj.
Krahasimet me politikën e të shkuarës, të cilën ka merak ta bëjë në çdo video punimesh e inaugurimesh që shpërndan me zell në media, kësaj radhe ia la Edi Ramës.
Siduket meraku i kryeministrit ishte më i madh për të thënë se ç'do kish qenë bërë Piramida nëse jo për socialistët.
Fjala iu dha edhe drejtorit të Fondit Shqiptaro-Amerikan, i cili vuri në dukje vlerat që mund të sjellë ky investim për të rinjtë e vendit.
Problemi në të gjithë këtë paradë ishte se Piramida u inaugurua si e përfunduar. Faktikisht, kjo është e pavërtetë.
Një xhiro rreth e përqark ish-maulozeumit të diktatorit komunist i mjafton çdokujt të bindet se punimet vazhdojnë.
Piramida është e rrethuar. Plehra mund të shohësh rreth e qark saj. Një vinç i madh e i kuq dominon qiellin mbi projektin e preferuar të Veliajt. Edhe kubët ngjyra-ngjyra të ndërtuar në oborrin e Piramidës janë të papërfunduar nga brenda. (Shikoni videon e përgatitur nga Lapsi.al)
Për të parë më shumë VIDEO si kjo ndiqni faqen Lapsi Videos në Facebook
Po, piramida ka ndryshuar rrënjësisht. Të rinjtë do kenë mundësi të mësojnë robotikë, programim, ndërtim e riparim. Por ajo është ende në gjendje kantieri.
Për të qenë korrektë, precedentin për të inauguruar projekte të papërfunduara nuk e ka vënë Erion Veliaj në vendin tonë. Ky precedent është kthyer në traditë. Rrugët e pambaruara po hapen me daulle e këngë. Kryeministrit i këndojnë sa me iso e sa me kore shkollash. Por vend ku të rinjtë shkojnë të mësojnë me vinçin qindra tonësh mbi krye? Kjo me siguri ndodh për herë të parë në Shqipërinë tonë.
©LAPSI.AL
