Avokatët e Arben Ahmetajt kanë deklaruar se në parashtrimin e akuzës nga prokurorët e SPAK nuk justifikohet arrestimi i klientit të tyre. Dukë folur pas mbledhjes së Këshillit të Mandateve, avokatët thanë se kanë mbajtur qëndrim të kundërt nga prokurorët.
“Kam dëgjuar fjalë që as i kemi dëgjuar. Po të më qëndroni pak më larg se është shumë vapë, do jua them me shumë qetësi. Ne mbajtëm qëndrim të kundërt me atë që kërkoi Prokuroria. Mesa mundëm të lexojmë, ne nuk vërejtëm kurrëkund asnjë rresht që të justifikonte nevojën pse Prokuroria ka nevojë për kontroll banese dhe masë sigurie ndaj deputetit Ahmetajt. Kjo mund të bëhet vetëm për shou për të treguar sesi dhunohet një deputet i Kuvendit. Jemi kundër arrestit të një deputeti”, u shpreh njëri prej avokatëve, Saimir Visha.
“Akuzat janë të gjitha hamendësime. Nuk ka asnjë fshjehje të pasurisë dhe asnjë lidhje me inceneratorët. Para 5 minutave kam komunikuar me Ahmetajn”, u shpreh avokati tjetër Henrik Ligori.
“Ju treguam çfarë biseduam këtu. Unë nuk gjej asnjë dëshmi kundër Ahmetajt. Mos flisni pa u njohur. Mbrojtja fillon nga evidentimi i të vërtetës. Ju e shtrembëroni të vërtetën. Pagesat nuk janë të vërtetuara. Miqësia nuk është vepër penale. Po i ke vërtetuara, vazhdo karrierën bëhu prokurore”, tha sërish Visha.
Sipas avokatëve, Arben Ahmetaj është larguar nga Shqipëria për arsye familjare. Ish zv.kryeministri u largua të premten disa orë para se SPAK të kërkonte arrestimin e tij. Sipas Zërit të Amerikës, Arben Ahmetaj ndodhet në Kanada.
Ndaj tij janë ngritur tre akuza për shpërdorim detyre dhe korrupsion, në lidhje me çështjen e inceneratorëve, ndërsa SPAK i ka sekuestruar dy vila, një në Lalëz, një në Palasë.
