Rusia ka nisur sërish sulme ajrore gjatë natës në Kiev, vetëm disa orë para fillimit të samitit të NATO-s në Lituani që do të trajtojë kërcënimet e sigurisë nga Moska.
“Armiku sulmoi Kievin për herë të dytë këtë muaj," tha Serhiy Popko, kreu i administratës ushtarake të Kievit, në një postim në Telegram.
Sistemet e mbrojtjes ajrore të Ukrainës rrëzuan të gjithë dronët Shahed të prodhuar nga Irani të lëshuar nga Rusia përpara se të arrinin objektivat e tyre, tha Popko. Nuk ka të dhëna të menjëhershme për dëme apo viktima. Sipas Forcave Ajrore të Ukrainës, alarmet për sulm ajror u dëgjuan në Kiev dhe në lindje të Ukrainës.
Samiti në Vilnius, i cili fillon të martën, do të mbizotërohet nga pasojat e pushtimit rus të Ukrainës, me liderët që do të miratojnë planet e para gjithëpërfshirëse të NATO-s që nga fundi i Luftës së Ftohtë për t’u mbrojtur kundër çdo sulmi nga Moska.
