Kryeministri shqiptar Edi Rama ka shigjetuar homologun e tij të Kosovës, Albin Kurti për mungesën e një takimi mes të dyve.
“Nuk jam unë që duhet të flas sepse e kam kërkuar unë takimin dhe është ai që nuk pranon. Ai duhet të sqarojë arsyet e refuzimit. Kanuni? Ishte një shprehje që në fakt kishte një farë kuptimi për situatën. Kanuni thotë që “shtëpia është e Zotit dhe e mikut”.
Mua nuk më shqetëson kjo. Më shqetëson diçka tjetër. Edhe në këtë koment nuk kemi një përgjigje zyrtare për takimin. Të gjitha qeveritë e tjera kanë reaguar menjëherë nëpërmjet kabineteve kur ne u kemi bërë kërkesën. Në këto momente as nuk mund të kontaktohet kabineti i qeverisë së Kosovës.
Kam bërë aq shumë kërkesa sa as Romeo nuk i ka bërë Zhuljetës për një takim. Ai thotë “Më ka ngel hatri” për anulimin e mbledhjes së qeverive. Po si i bëhet? Do ta lëmë fatin e Kosovës me ngelje hatri?
Unë nuk kam asnjë interes në Kosovë. Nuk kam parti në Kosovë. Kam ardhur këtu për një proces ku çdo vend është i interesuar të marrë pjesë.
Kemi komunikuar. Më saktë unë jam përpjekur të komunikoj por është një moment i vështirë.
Unë kam insistuar që të takoheshim paraprakisht bashkë dhe të ndaja disa shqetësime që të lehtësoja pozicionin e Kosovës. I kam kërkuar Borrell që të shtynte disa ditë masat. Ia kam thënë që nuk mund të bëjë një mbledhje qeverish sikur asgjë nuk po ndodh. Meqë ai e kishte shqetësim ne i firmosëm marrëveshjet.
Është e rëndësishme që ta shfrytëzoj këtë mundësi që më jepni. Ne do presim samitin e Berlinit në Tiranë. Ne do të bëjmë të gjitha përpjekjet që të materializojmë një plan të ri për vendet e Ballkanit Perëndimor” – tha Rama në një intervistë në Klan Kosova. ©LAPSI.al
