Rreth një milion persona aplikuan për azil në vendet anëtare të BE-së në vitin 2022, ndërsa Gjermania ka kryesuar listën e vendeve për të cilën aplikohen, tha sot Agjencia e Azilit të BE-së (EUAA).
Sipas agjencisë, kjo shënon një rritje prej afërsisht 50% krahasuar me vitin 2021 në të ashtuquajturat vende të BE+, duke përfshirë Islandën, Lihtenshtejnin, Norvegjinë dhe Zvicrën.
Nga afro një milion aplikime për azil të dorëzuara vitin e kaluar, shumica e migrantëve janë pranuar nga Gjermania (244 000), Franca (156 000), Spanja (118 000), Austria (109 000) dhe Italia (84 000), duke arritur në 996 000 aplikime.
Pavarësisht rritjes së konsiderueshme, shifrat rekord të azilit të parë në Evropë në 2015 (1,4 milionë) dhe 2016 (1,3 milionë) nuk janë tejkaluar.
“Megjithatë, vendet individuale të BE-së regjistruan numrin më të lartë të aplikimeve, që nga fillimi i mbledhjes së të dhënave pan-evropiane në 2008, duke përfshirë Austrinë, Francën, Spanjën dhe Portugalinë”, sipas EUAA.
Shumica e aplikimeve janë kryer nga individë nga Siria, Afganistani, Turqia, Venezuela dhe Kolumbia.
“Kombinimi i krizave, përfshirë konfliktet e reja dhe ato të vazhdueshme, goditjet klimatike, trazirat gjeopolitike, dhunën dhe persekutimin, bëri që miliona njerëz të largoheshin nga shtëpitë e tyre në vitin 2022”, thuhet në raport.
Rreth 42 000 fëmijë dhe të mitur të pashoqëruar ishin në mesin e aplikantëve, numri më i lartë që nga viti 2016, me gati dy të tretat e tyre që vinin nga Afganistani ose Siria.
Shifrat e vitit 2022 nuk përfshijnë rreth 4 milionë refugjatët e luftës nga Ukraina, të cilët nuk duhet të kalojnë nëpër procedura të gjera azili.
Sipas “Raportit të Azilit të EUAA 2023”, pushtimi rus i Ukrainës rezultoi në një nga krizat më të zhvilluara dhe më të mëdha të zhvendosjes së refugjatëve që nga Lufta e Dytë Botërore.
“Rreth 5 milionë individë që kërkonin mbrojtje mbërritën në Evropë në vitin 2022”, tha EUAA në raportin e saj.
