Franca mobilizoi dje në mbrëmje rreth 45 000 oficerë policie për shkak të trazirave, ndërsa qeveria tha se dhuna është qetësuar, situata nuk është aspak e zgjidhur.
Ministri i Brendshëm, Gérald Darmanin argumentoi vendosjen e forcave speciale dhe automjeteve të blinduara në terren, duke thënë se kjo do të ndihmonte në vënien nën kontroll të situatës. Ministri premtoi mbështetje për biznesmenët e prekur nga shkatërrimet dhe grabitjet. Disa qytete dhe rajone franceze njoftuan fondet e ndihmës për të ndihmuar tregtarët.
Që nga vdekja e 17-vjeçarit Nahel, i cili u qëllua nga një oficer policie gjatë një kontrolli në trafik të martën e kaluar, Franca është tronditur nga trazira masive, veçanërisht gjatë natës.
Ka pasur incidente të përsëritura të plaçkitjeve, zjarrvënieve dhe konfrontimeve të dhunshme mes policëve dhe rebelëve. Që nga fillimi i trazirave, ka pasur më shumë se 3 000 arrestime në mbarë vendin.
“Franca është një shtet kushtetues dhe policia gjithashtu i nënshtrohet ligjit”, theksoi qeveria. Oficeri që qëlloi me armë zjarri ndaj të riut po hetohet nën dyshimin për vrasje nga pakujdesia.
“Policia franceze nuk ka probleme me racizmin dhe përdorimin e armëve të zjarrit. Vdekja e të riut ishte tragjike dhe emocionale. Policia ka treguar profesionalizëm ditët e fundit, pavarësisht trazirave të dhunshme, nuk ka patur të vdekur as nga ana e rebelëve dhe as nga ana e oficerëve”, thuhet në deklaratën e qeverisë franceze.
“Në mbarë vendin pati 157 arrestime gjatë natës së së hënës”, tha Ministria e Brendshme në Paris. Sipas gazetës “Le Parisien”, u dogjën 297 automjete dhe 34 ndërtesa.
Në shenjë solidariteti dhe proteste kundër sulmit të hënën u zhvilluan mitingje para bashkive në shumë qytete franceze. Kryebashkiaku i periferisë së Parisit të Corbeil-Essonnes, Bruno Pirot, theksoi se të rinjtë në trazira vinin nga zonat problematike dhe ishin të pafavorizuar në shkollë dhe në punë.
