Policia italiane ka arrestuar një 18-vjeçar me origjinë shqiptare këtë të enjte, pasi shiste drogë në ambientet e liqenit në Alto Garda.
Sipas autoriteteve, i riu është identifikiuar në kuadër të veprimeve të kontrollit territorial nga karabinierët, me qëllim parandalimin e trafikut të drogës. Banorët e zonës kanë pikasur veprimtarinë e jashtëligjshme të shtetasit shqiptar duke njoftuar policinë.
18-vjeçari shqiptar u arrestua në flagrancë me disa doza kokaine në xhep. Efektivët më pas ushtruan një kontroll fizik në shtëpinë e të riut ku kanë gjetur dhe sekuestruar edhe 25 doza të tjera kokaine të paketuara dhe gati për shitje.
Gjithashtu në banesën e tij, policia gjeti dhe rreth tre mijë euro cash të cilat dyshohet se janë benefite nga shitja e drogës. Sipas medieve italiane, i riu shqiptar u transferua në burgun Spini di Gardolo dhe do të presë vendimin nga gjykata.
