Misioni i NATO-s në Kosovë, KFOR, i ka bërë thirrje Kosovës dhe Serbisë që të kthehen në tryezën e dialogut dhe të përmbahen nga veprimet provokuese.
KFOR-i ka theksuar se mbetet vigjilent dhe plotësisht i aftë për të përmbushur mandatin e tij për të siguruar një mjedis të sigurt dhe lirinë e lëvizjes për të gjitha komunitetet në Kosovë, sipas Rezolutës 1244 të vitit 1999.
‘KFOR-i vazhdon të mbështesë dialogun e lehtësuar nga BE-ja si mjeti i vetëm për të arritur një stabilitet të pakthyeshëm dhe të qëndrueshëm dhe për të zbutur tensionet në veri të Kosovës’, thuhet në komunikatën e KFOR-it.
Ky mision ka theksuar se mbetet në kontakt dhe koordinim të ngushtë me të gjithë bashkëbiseduesit vendorë dhe ndërkombëtarë, përfshirë përfaqësuesit e institucioneve në Kosovë, UNMIK-un, OSBE-në, EULEX-in dhe Shefin e Mbrojtjes së Serbisë.
‘KFOR-i mirëpret të gjitha përpjekjet shumëkombëshe të ndërmarra për të rikthyer të dyja palët në tryezën e negociatave dhe fton të gjitha palët që të bashkohen drejt de-përshkallëzimit dhe të përmbahen nga veprimet provokuese që janë kundër interesave të të gjithë njerëzve në Kosovë’, ka thënë tutje ky mision.
Kujtojmë se të hënën pak para mesnatës, persona të panjohur e kanë hedhur një granatë dore në afërsi të objektit të komunës së Mitrovicës së Veriut, ku si pasojë dy vetura janë dëmtuar.
