Juristi Ylli Manjani, ish ministër i Drejtësisë, ka reaguar sot për mbajtjen në burg të kryetarit të zgjedhur të Bashkisë së Himarës, Fredi Beleri, duke e konsideruar atë në kundërshtim flagrant me ligjet e shtetit dhe në dhunim të plotë të Kushtetutës.
Duke marrë shka nga një konferencë shtypi e kryeministrit Rama, Manjani i ka kërkuar atij se përpara se të kërkojë Vuçiçit lirimin e tre policëve të Kosovës, të lejojë të zgjedhurin e Himarës të shkojë në zyrë duke respektuar vendimin e popullit.
Manjani gjithashtu ka evidentuar se paraburgimi i Belerit po sajohet me dëshmi penaliteti fallco. Në fakt, dëshmia e penalitetit që i referohet Manjani, i majit 2023 e nxjerr Belerin të dënuar, ndërkohë që nga një verifikim i thjeshtë në e- albania, rezulton krejt ndryshe. (fotot poshtë)
Reagimi i plotë i Manjanit:
Lëri policët e Kosovës që ka arrestuar Vuçiçi, po lejo të zgjedhurin e Himarës të shkojë në zyrë, o zotni! Rrespekto pa kushte vullnetin e popullit tënd njëherë, pastaj jep mend për punët e të tjerëve.
Fredi Beleri mbahet në paraburgim pa asnjë argument bindës dhe në kundërshtim flagrant me ligjet e shkruara të këtij shteti.Mbahet në paraburgim me sajesa policësh të qeverisë dhe së fundi edhe me dëshmi penaliteti fallco.
Mbahet në paraburgim në dhunim të plotë të Kushtetutës së Shqipërisë, të Lirive e të drejtave themelore dhe gjithashtu të parimit Europian të autonomisë vendore. ©lapsi.al
